विराटनगर । नेपाल आयल निगमले इन्धनको मुल्य वृद्धि गरेपछि विराटनगरमा यातायात व्यावसायी र मजदुरहरुले चक्काजाम गरेका छन् ।
इन्धनको मुल्य वृद्धि गरेको भन्दै सोमबार बिहान उनीहरुले कोशी राजमार्गअन्तर्गत विराटनगरको राजवशी चोकमा सडकमा नै सवारी साधन तेर्साएर चक्काजाम गरेका हुन् ।
सवारी चालकहरुले बढेको मूल्य फिर्ता हुनुपर्ने माग राख्दै विरोध जनाएका हुन् । त्यस्तै सर्वसाधारणलाई इन्धनको भाउ बढेपछि पुरानै भाडादरमा यात्रा गराउन नसक्ने पनि उनीहरूले बताएका छन् । आइतबार रातिबाट निगमले डिजेल तथा मट्टीतेलमा प्रतिलिटर २७ रुपैयाँले र पेट्रोलमा प्रतिलिटर २१ रुपैयाँले मूल्य वृद्धि गरेको छ ।
मूल्य वृद्धि भएपछि एक लिटर पेट्रोलको मूल्य १९९ रुपैयाँ पुगेको छ भने एक लिटर डिजेल र मट्टितेलको मूल्य १९२ रुपैयाँ पुगेको छ ।
