काठमाडौं । प्रधानमन्त्री शेरबहादुर देउवा अन्तर्राष्ट्रिय सम्बन्ध समितिको बैठकमा अनुपस्थित हुनुभएको छ ।
सिंहदरबारस्थित संसदीय सचिवालयमा बिहान १० बजे बस्ने भनिएको बैठकमा प्रधानमन्त्री देउवाले स्टेट पार्टनरसिप प्रोग्राम (एसपीपी) र आसन्न अमेरिका भ्रमणबारे जानकारी गराउनुहुने कार्यसुची रहेको थियो ।
तर प्रधानमन्त्रीले आफूलाई यसबारे जानकारी नै नभएको जवाफ पठाउनुभएको छ । यता संसदीय समितिले यसअघि नै शुक्रबार बसेको बैठकले यी दुई बिषयमा जानकारी गराउन प्रधानमन्त्री देउवालाई आमन्त्रण गर्ने निर्णय गरेको थियो र पत्राचार पनि गरिसकेको थियो ।
प्रधानमन्त्रीको तर्फबाट आफूहरू धनगढीमा रहेको र पत्र नै प्राप्त नभएको जवाफ आएको समितिका सभापति पवित्रा निरौलाले जानकारी दिनुभएको हो ।
