काठमाडौँ । अर्थमन्त्री जनार्दन शर्माले कर, राजश्व र भन्सार दरमा प्रक्रियाअनुसार परिवर्तन भएको बताएका छन् । प्रतिनिधिसभाको बिहीबारको बैठकमा अर्थमन्त्रालयका लागि विनियोजित बजेटमाथि सांसदहरुको प्रश्नको जवाफ दिने क्रममा उनले कर, राजश्व र भन्सार दर परिवर्तनमा कुनै गद्दारी र राष्ट्रघात भए त्यसको सम्पूर्ण जिम्मेबार आफू रहने बताए ।
अर्थमन्त्री शर्माले राजश्वका दर सचिव र विभागीय प्रमुखको समितिले नै निर्धारण गरेको जानकारी दिए । राजश्वको दरहरु परिवर्तन गर्न आवश्यक प्रक्रिया हुने उल्लेख गर्दै उनले सम्बन्धित विभागीय प्रमुख र सचिवसहितको समितिले करको दर परिवर्तन गर्ने चलन रहेको बताए ।
सो समितिले करका दर परिवर्तनसम्बन्धी गरेको व्यवस्थाप्रति आफू पूर्ण जिम्मेबार र जवाफदेही रहेको उनको भनाइ थियो । उनले भने, “त्यसमा कतै राष्ट्रघात वा गद्दारी भएको छ भने म त्यसको पूर्ण जिम्मेवारी लिन तयार छु ।”
करका दर परिवर्तनमा कुनै राष्ट्रघात नभएको जिकिर गर्दै अर्थमन्त्री शर्माले मुलुकको डलर सञ्चिति, आयात, उत्पादन र औद्योगिक क्षेत्रलाई ध्यानमा राखेर दरहरु परिवर्तन भएको स्पष्ट गरे ।
अर्थमन्त्रीले जवाफ दिँदै गर्दा प्रमुख प्रतिपक्षी दल नेकपा (एमाले) ले अर्थमन्त्रीको जवाफको कुनै अर्थ नभएको भन्दै सदन बहिष्कार गरेको छ ।
