काठमाडौँ । प्रधानमन्त्री शेरबहादुर देउवाले अमेरिकाले प्रस्ताव गरेको स्टेट पार्टनरसीप प्रोग्राम (एसपीपी) सम्झौतामा सरकारले हस्ताक्षर गर्ने अहिलेसम्म कुनै निर्णय नभएको बताउनुभएको छ ।
अमेरिकासँग हुने भनिएको एसपीपी सम्झौताबारे सत्ता साझेदार दल र प्रतिपक्षी दलबाट तीव्र आलोचना भएपछि प्रधानमन्त्री देउवाले सत्ता गठबन्धनका दलका नेताहरुसँग एसपीपी सम्झौतामा हस्ताक्षर गर्ने निर्णय नभएको बताउनुभएको हो ।
प्रधानमन्त्रीको सरकारी निवास बालुवाटारमा नेकपा (माओवादी केन्द्र) का अध्यक्ष पुष्पकमल दाहाल प्रचण्ड, नेकपा (एकीकृत समाजवादी) का अध्यक्ष माधवकुमार नेपाल र जनता समाजवादी पार्टी (जसपा) का अध्यक्ष उपेन्द्र यादवसँग भएको छलफलका क्रममा प्रधानमन्त्री देउवाले मुलुकको सार्वभौमिकतामाथि प्रश्न उठ्ने हिसाबले सरकारले कुनै पनि सम्झौता नगर्ने प्रतिबद्धता व्यक्त गर्नुभएको हो ।
उहाँले एसपीपी सम्झौताबारे सार्वजनिक भएको मस्यौदामा कुनै सत्यता नभएको बताउनुभयो । एकीकृत समाजवादीका अध्यक्ष नेपालका अनुसार छलफलमा प्रधानमन्त्री देउवाले मुलुकको हितमा नहुने कुनै पनि सम्झौता नगर्ने आश्वासन दिनुभएको थियो ।
प्रधानमन्त्री देउवालाई उद्धृत गर्दै नेपालले भन्नुभयो, “एसपीपी पहिलेदेखि नै चर्चामा आएको विषय हो, सबैको सहमति नहुने विषयमा म कसैले कर गरेर गर् भने पनि गर्दिनँ ।”
नेपालका अनुसार प्रधानमन्त्री देउवाले असंलग्न पराराष्ट्र नीति नछाड्ने भनेर आश्वास दिनुभएको छ । प्रधानमन्त्रीले नेपालको वर्तमान परराष्ट्र नीतिमा कुनै विचलन आउन नदिने पनि बताउनुभयो ।
