काठमाडौँ। खाना पकाउने ग्यासको आपूर्ति सहज बनाउन माग गर्दै नेकपा बहुमतले प्रदर्शन गरेको छ ।
नेकपा बहुमतले शनिवार माईतघरमा प्रदर्शन गरेको हो । नेकपा बहुमत पार्टीका कार्यकर्ताहरुले सरकारलाई व्यङ्ग्य गर्दै थालमा चामल राखेर प्रर्दशन गरेका थिए । उनीहरुले मंहगी उच्च र ग्यास अभाव हुँदा पनि सरकार नदेखेको आरोप लगाएका छन् ।
जनताको समस्यामा दुई तिहाईको सरकार नै हराएको उनीहरुको आरोप छ । नेकपा बहुमतको अध्यक्षमण्डलका सदस्य गुणराज लोहनीले सरकारले तत्काल ग्यास आपूर्ति सहज नगरे पार्टीले ग्यास डिपोमा रहेका ग्यास आफैले वितरण गर्ने चेतावनी दिनुभयो । उहाँले पर्याप्त ग्यास भएपनि सरकारले वितरण गर्न नसकेको आरोप लगाउनु भयो ।
उहाँले डिलरमार्फत नियमित रूपमा ग्यास वितरणको व्यवस्था गर्न सरकारसँग माग गर्नुभयो । उहाँकाअनुसार आपूर्ति व्यवस्थापनका लागि सेना तथा प्रहरी परिचालन गरेर डिलरबाट ग्यास वितरण गर्ने वातावरण बनाउन आवश्यक छ । उहाँले ठूला होटलमा मौज्दात रहेको ग्याससमेत आवश्यकताअनुसार वितरण गर्नुपर्ने बताउनुभयो ।
ग्यासको वितरणमा अनियमितता र कालोबजारी भएको आरोप लगाउँदै उहाँले त्यसको छानबिन गर्न पनि माग गर्नुभयो । उहाँले सामान्य उपभोक्ता र साना व्यवसायीले ग्यास नपाउने तर ठूला होटलमा ग्यास उपलब्ध हुने अवस्था अन्त्य गर्नुपर्ने बताउनु भयो ।
सरकारले तत्काल समस्या समाधान नगरे आफूहरू डिलरमा पुगेर जनताको सहभागितामा ग्यास वितरण अभियान सञ्चालन गर्ने उहाँले चेतावनी दिनुभयो । त्यसक्रममा गिरफ्तारी दिनुपरे पनि तयार रहेको उहाँको भनाइ छ । वर्तमान सरकारले प्रभावकारी रुपमा काम गर्न नसकेको उहाँको आरोप छ ।
उहाँले भन्नुभयो, ‘सरकारले ग्यास अब अरु चार–पाँच दिनमा राम्रोसंग वितरण गरेन भने हामीले नै जनतालाई ग्यास बाँड्ने हाम्रो अभियान छ । हामी डिलरमा गएर आह्वान गर्छौँ, जनतालाई आउनुस् भनेर डिलरमा लुकाईएको ग्यास वितरण गर्छौ, त्यसपछि के परिणाम हुन्छ, हेरौला ।
अस्ति मात्रै ५३ हजार सिलिन्डर आएको छ, हिजो ४३ हजार आएको छ, त्यसले राम्रो व्यवस्थित गरेमा जति पनि पुग्छ । त्यस्तै होटलहरुमा राखिएको ७ हजार भन्दा बढी ग्यास बाँडे पनि पुग्छ । जनता खान नपाउने अवस्थामा पुगिसके, जनता उस्तै परे ग्यास नपाएर आत्महत्या गर्नुपर्ने स्थिति भइसकेको छ । अहिले भएको ग्यास डिलरबाट निकालेर प्रत्येक दिन राम्रोसँग सेना प्रहरी परिचालन गरेर सहज रुपमा बाँड्ने व्यवस्था गर्नुपर्छ । ग्यास अहिले जत्ति भने नि छ, त्यसलाई डिलरबाट निकालेर बाँडे मात्रै पनि पुग्छ ।’
प्रदर्शनमा सहभागी नेकपा बहुमतका नेताहरूले ग्यासको सहज आपूर्ति, महँगी नियन्त्रण र कालोबजारी अन्त्य गर्न सरकारसँग माग गरेका छन् ।
प्रर्दशनकारीहरुले ‘महंगीको मार, ग्यासको हाहाकार, कहाँ छ सरकार’, खै ग्यास बालेनले लुकायो, ‘खै बालेन माफियाले डुबायो’, दुईतिहाईको सरकार ओई, जनतालाई ग्यास खोई ?’, ‘भोको पेटले के भन्छ, भरि ग्यास दे भन्छ’, ‘बढ्दो मंहगी नियन्त्रण गर ! ग्यासको आपूर्ति सहज गर !’, ‘गरिबको चमेली ग्यास दिने कोही छैन’, ‘जनता ग्यास खोज्दै सरकार बाहाना खोज्दै’ लगायतका नारा लेखेको प्लेकार्ड बोकेका थिए ।–न्युज एजेन्सी नेपाल
