काठमाडौँ । प्रधानमन्त्री शेरबहादुर देउवाले अमेरिकी सरकारसँग स्टेट पार्टनरसीप प्रोग्राम (एसपीपी) सम्झौता गर्ने भएपछि त्यसको विरोधमा सत्तारुढ दल तथा विपक्षी दलहरु लागेका छन् । यो समाचारका कारण सत्ता गठबन्धनमा नै संकट आउने देखिएको छ । त्यसो त प्रधानमन्त्री शेरबहादुर देउवाले यसपटकका लागि सो सम्झौता नगर्ने पक्षमा पुगेको पनि समाचार स्रोतले जनाएको छ ।
प्रधानमन्त्री देउवाले आफ्नो अमेरिका भ्रमणमा एसपीपी सम्झौता गर्ने समाचार आएपछि व्यापक विरोध भएको हो । अहिले पनि सो विरोध भइरहेको छ । त्यो पनि सत्तारुढ दलभित्रै धेरै विरोध भएपछि प्रधानमन्त्रीले सरकारमाथि नै दखल पर्न जाने आँकलन गरेर यस विषयमा पुनर्विचार गर्न लागेको बुझिएको छ ।
यसैबीच आजै यसबारे उठेका आशंका र प्रश्नहरूमा प्रधानमन्त्रीका तर्फबाट संसद्मा मन्त्रीहरूले जवाफ पनि दिने भएका बताइएको छ । यस सम्झौतका विषयमा देशमा धेरै नै हल्ला मच्चिएपछि यससम्बन्धी सत्य तथ्य बाहिर ल्याउन सरकार लागेको र आज संसदमा बोल्ने क्रममा मन्त्रीहरुले यसको बचाउमा बोल्न भनिएको बुझिएको छ ।
उता प्रतिनिधिसभा बैठकमा मंगलबार परराष्ट्रमन्त्री नारायण खड्काले पनि एसपीपी हिन्द–प्रशान्त रणनीतिको हिस्सा नभएको भन्दै सम्झौता हुन सक्ने संकेत गरेका थिए । मन्त्री खड्काको यो जवाफपछि पनि उक्त सम्झौताको झन् विरोध भएको छ ।
