काठमाडौं । अमेरिकामा जारी आईसीसी पुरुष क्रिकेट विश्वकप लिग टु अन्तर्गत त्रिकोणात्मक सिरिजको पहिलो खेलमै नेपालले हार ब्यहोरेको छ ।
अमेरिकाको टेक्सासस्थित मोसा क्रिकेट मैदानमा शुक्रबार बिहान भएको खेलमा नेपाल ओमानसँग १३ रनले पराजित भएको हो । ओमानले दिएको २ सय १२ रनको लक्ष्य पछ्याएको नेपाल ४९ ओभर ४ बलमा अलआउट हुँदै १ सय ९८ रनमा समेटियो ।
नेपालका लागि आरिफ शेखले ६६ रनको अर्धशतकीय इनिङ्स खेले । यस्तै, देव खनालले ३४ तथा रोहित पौडेलले २० र दिपेन्द्र सिंह ऐरीले १६ रन जोडे ।
त्यस्तै विनोद भण्डारीले १४, सोमपाल कामीले १३, डेब्यु खेलाडी सुनिल धमलाले १२, करण केसीले ८ रन जोडे । ओपनर सुवास खकुरेल ३ र कप्तान सन्दीप लामिछाने २ रनमा आउट भए भने सुशन भारी सुन्य रनमा अविजित रहे ।
ओमानका जिसन मक्सुद र खवर अलिले ३र३ विकेट लिए । बिलाल खानको नाममा २ विकेट रह्यो । त्यसअघि टस जितेर पहिले ब्याटिङ गरेको ओमानले ५० ओभरमा ८ विकेट गुमाएर २ सय ११ रन जोड्यो ।
ओमानका लागि जिसन मक्सुदले अविजित रहदै १ सय ४ रनको शतकीय इनिङ्स खेले । खवर अलिले ३०, सोयब खानले २७ रन जोड्दा ।सुरज कुमार १२ रनमा आउट भए ।
नेपालका करण केसीले ५ विकेट लिए । उनी सोमपाल कामी र सन्दीप लामिछाने पछि एकदिवसीय अन्तराष्ट्रियको एकै खेलमा ५ विकेट लिने नेपालका तेस्रो खेलाडी समेत बने । यसैगरी सन्दीपले २ विकेट लिँदा सोमपालको नाममा १ विकेट रह्यो ।
यस हारसँगै नेपाल १२ खेलमा १२ अंक जोडेर छैटौं स्थानमा रहेको छ । ओमान ३३ खेलमा ४२ अंक जोडेर शीर्ष स्थानमा रहेको छ । अब नेपालले दोस्रो खेल अमेरिकाविरुद्ध खेल्नेछ ।
