काठमाडौँ । राष्ट्रिय प्रजातन्त्र पार्टी (राप्रपा) का प्रवक्ता मोहन श्रेष्ठले राष्ट्रिय प्रजातन्त्र पार्टी (राप्रपा) नेपालका अध्यक्ष कमल थापालाई अन्य पार्टीहरुले के त्यागेमा एकता गर्नुहुन्छ भनी प्रश्न गर्नुभएको छ ।
बुटवलमा बिहीबार आयोजित पत्रकार भेटघाटमा राप्रपा नेपालका अध्यक्ष थापाले राजतन्त्रको एजेन्डा त्यागे राप्रपा नेपालले राजेन्द्र लिङ्देन नेतृत्वको राप्रपासँग एकता गर्न सकिने बताउनुभएपछि राप्रपा प्रवक्ता श्रेष्ठले त्यस्तो प्रश्न गर्नुभएको हो ।
उहाँले भन्नुभयो, “कमल थापाज्युलाई शालिनतापूर्वक एउटा प्रश्न सोध्न चाहन्छु– एमालेले के त्यागेमा एमालेसँग, माओवादीले के त्यागे माओवादीसँग र कांग्रेसले के त्यागे कांग्रेससँग एकता गर्नुहुन्छ ?”
लिङ्देन नेतृत्वको राप्रपाले राजतन्त्र र हिन्दू राष्ट्रको पुनःस्थापनालाई आफ्नो मुख्य एजेन्डा बनाएको छ भने थापा नेतृत्वको राप्रपा नेपालले हिन्दू राष्ट्रको पुनःस्थापनामा जोड दिए पनि राजतन्त्रको पुनःस्थापनाको एजेन्डलाई परित्याग गरेको छ ।
बुटवलमा अध्यक्ष थापाले जनतालाई राजतन्त्र पुनःस्थापना हुन्छ भनेर अब भ्रममा पार्न नहुने भन्दै आफ्नो पार्टीले राजतन्त्रको एजेन्डासमेत छाडेको बताउनुभएको थियो । राजतन्त्रका लागि अब सती जान नसक्ने उहाँको भनाइ थियो ।
राप्रपाका प्रवक्ता श्रेष्ठले राजतन्त्रको एजेन्डा त्याग गरिसकेका अध्यक्ष थापालाई प्रश्न गर्नुभयो, “पछिल्लो कार्यनीतिअनुसार वैचारिकरुपमा राप्रपासँग भन्दा तपाईंको निकटता कांग्रेस, एमाले र माओवादीसंग होइन र र?”
