काठमाडौँ । सुरक्षाको प्रत्याभूति नहुँदा बिहीबार बिहान काठमाडौँको फोहोर बन्चरेडाँडा ल्यान्डफिल साइट पठाइएको छैन । सुरक्षाको व्यवस्था नभएपछि फोहोरका गाडी बन्चरेडाँडा पठाउने वा नपठाउने भन्नेबारे अन्योल छ ।
बुधबार स्थानीयवासी र प्रहरीबीच झडप हुँदा प्रहरीसमेत घाइते भएपछि फोहोर लिएर गएका गाडीहरु फोहोर विसर्जन नगरी काठमाडौँ फर्केका थिए ।
बुधबार स्थानीयवासीले गाडी नै तोडफोड गरेपछि सुरक्षा व्यवस्था सुदृढ बनाएर मात्र फोहोरका गाडी पठाउनेबारे छलफल भइरहेको काठमाडौँ महानगरपालिकाका नगरप्रहरी प्रमुख धनपति सापकोटाले बताए ।
बुधबार केही स्थानीयवासी पनि झडपमा परी घाइते भएका थिए । प्रहरीले समेत सुरक्षा दिन नसकेपछि फोहोरका गाडी फर्काइएको थियो ।
केही दिनअघि शहरी विकास मन्त्रालय, काठमाडौँ नगरपालिका, नुवाकोटको ककनी गाउँपालिका र धादिङको धुनिबेँसी नगरपालिकाका प्रतिनिधिहरुबीच मंगलबारदेखि काठमाडौँको फोहोर विसर्जन गर्ने सहमति भएको थियो । तर स्थानीयवासीले आफ्ना माग पूरा नभएसम्म फोहोर विसर्जन गर्न नदिने भन्दै अवरोध गरिरहेका छन् । उनीहरुले त्यस्तो सहमति नमान्ने बताउँदै आएका छन् ।
सहमतिअनुसार स्वास्थ्य बीमा बोर्डबाट दोहोरो नपर्ने गरी धुनीबेँसी नगरपालिकाको वडा नं १, ३ र ४ तथा ककनी गाउँपालिकाको वडा नं १, २ र ३ का स्थायी बासिन्दाको स्वास्थ्य बीमा एका साताभित्रै काम सुरु गर्ने, ती क्षेत्रलाई विगतदेखि उपलब्ध गराउँदै आएको अनुदानलाई निरन्तरता दिने र १० दिनभित्र ल्यान्डफिल साइटमा रसायन छर्केर दुर्गन्ध हटाउने प्रतिबद्धता काठमाडौँ महानगरपालिकाले गरेको थियो ।
साथै असार मसान्तपछि फोहोर उठाउने स्रोतमै फोहोर छुट्याएर मात्रै ल्यान्डफिल साइटमा लैजाने समेत महानगरपालिकाले प्रतिबद्धता गरेको थियो । सो समयसम्मका लागि काठमाडौँ महानगरमा थुप्रिएका फोहोरलाई लगेर ल्यान्डफिल साइटमा फालेपछि माटोले उचित तरिकाले पुर्नेसमेत सहमति भएको थियो ।
त्यस्तै वातावरणीय प्रभाव मूल्यांकनका आधारमा छ महिनाभित्र सिसडोलको डम्पिङ साइटमा पोस्ट क्लोजर प्रक्रिया सुरु गर्ने पनि महानगरले प्रतिबद्धता जनाएको थियो ।
तर उक्त सहमतिमा विरोध जनाउँदै स्थानीय बासिन्दाले केही जनप्रतिनिधिलाई लोभ र त्रास देखाएर हस्ताक्षर गराएको बताएका छन् । उनीहरुले सहमति गर्दा संघर्ष समितिलाई बेवास्ता गरेको आरोप लगाएका छन् ।
