काठमाडौँ : प्रधानमन्त्री शेरबहादुर देउवा समक्ष महन्थ ठाकुर नेतृत्वको लोकतान्त्रिक समाजवादी पार्टीले ११ बुँदे ज्ञापनपत्र बुझाएको छ ।
मंगलबार बिहान प्रधानमन्त्री निवास बालुवाटार पुगेर लोसपाका नेताहरूले नागरिकता विधेयक, मधेस तथा थरुहट आन्दोलनकारीमाथि लागेका मुद्दा फिर्ता र रिहाइ तथा सम्झौता कार्यान्वयन लगायतका माग समेटिएको ज्ञापनपत्र बुझाएका हुन् ।
ज्ञापनपत्रमा संविधानअनुसार जन्मसिद्ध नागरिकका सन्तानलाई अबिलम्ब नागरिकता प्रमाणपत्र प्रदान गर्न र वैवाहिक अंगीकृतसम्बन्धी हालसम्म कायम रहेको कानुनी व्यवस्थालाई निरन्तरता दिन माग गरिएको छ ।
त्यस्तै, मधेस र थरुहट आन्दोलनकारीमाथि लगाइएका मुद्दा फिर्ता र निलम्बित सांसद रेशम चौधरीलाई रिहाइको माग गर्नुका साथै किसानलाई मलखादको व्यवस्था अविलम्ब गर्न सरकारसँग माग गरेको छ ।
प्रधानमन्त्रीलाई ज्ञापनपत्र बुझाउन अध्यक्ष ठाकुर, नेताहरू राजेन्द्र महतो, शरतसिंह भण्डारी, लक्ष्मणलाल कर्ण, अनिल झा, उमाशंकर अरगरिया, चन्दा चौधरी लगायत बालुवाटार पुग्नु भएको थियो ।
प्रधानमन्त्री देउवासँग केही दिनअघि जसपा अध्यक्ष महन्थ ठाकुरले बालुवाटारमै गएर भेटघाट गर्नु भएको थियो । पछिल्लो समय लोकतान्त्रिक समाजवादी पार्टीसँग प्रधानमन्त्री देउवाको बाक्लै भेटघाट र वार्ता हुनेक्रम बढेको छ । खासगरी सत्ता गठबन्धनमा सहभागी उपेन्द्र यादव नेतृत्वको जनता समाजवादी पार्टीले आफ्ना मागहरु बढाउन थालेपछि लोसपासँग वार्ताहरु घनीभूत हुन थालेको जानकारहरु बताउँछन् ।
