काठमाडौं । नेकपा (एकीकृत समाजवादी) ले संघीय सरकारमा सहभागी सबै मन्त्रीहरुलाई फिर्ता बोलाउने भएको छ । पार्टीका सम्मानित नेता झलनाथ खनालले पार्टीको आज बसेको सचिवालय बैठकले यस्तो निर्णय गरेको जानकारी दिए ।
नेता खनालका अनुसार प्रधानमन्त्री शेरबहादुर देउवासँग छलफल गरेर भोलि सोमबार बैठकको निर्णय कार्यान्वयन हुनेछ ।
उपमहासचिव विजय पौडेलका अनुसार पार्टी अध्यक्ष माधवकुमार नेपालले शीर्ष नेताहरुसँग परामर्श गरेर मन्त्रीहरु परिवर्तन गर्नेछन् । अहिले बहाल मन्त्रीहरुलाई सरकारमा पठाउँदा छ महिनाको समय दिइएको बताइएको छ ।
सचिवालय बैठकपछि पत्रकारहरुसँग कुराकानी गर्दै उपमहासचिव पौडेलले मन्त्रीहरुलाई पठाएको छ महिना व्यतित भइसकेकाले शीर्ष नेतासँग समझदारी अध्यक्ष नेपालले उपयुक्त निर्णय लिनुहुने बताए । उनले पार्टीले मन्त्रीको हेरफेर गर्ने निर्णय गरे सबै मन्त्रीले मान्नुपर्ने बताए । यसलाई मन्त्रीहरुले स्वाभाविक मान्नुपर्ने उनको भनाइ थियो ।
