काठमाडौं । नेकपा(माओवादी केन्द्र)की नेता पुर्णकुमारी सुवेदीले पार्टीबाट उपप्रमुखमा निर्वाचित महिला जनप्रतिनिधिहरुलाई आगामी निर्वाचनका लागि प्रमुखमा तयारी गर्न निर्देशन दिनुभएको छ ।
शुक्रबार अखिल नेपाल महिला संघ(क्रान्तिकारी)ले आयोजना गरेको स्थानीय तह निर्वाचनमा माओवादी केन्द्रको तर्फबाट निर्वाचित महिला जनप्रतिनिधिहरुलाई बधाई तथा अभिनन्दन कार्यक्रमलाई सम्बोधन गर्दै उहाँले उपप्रमुखमा निर्वाचित महिलाहरुले आगामी निर्वाचनमा प्रमुखका लागि तयारी गर्नुपर्ने बताउनुभएको हो । त्यसको निम्ति आउने बाधा, अड्चनमा आफुहरुले साथ दिने उहाँले बताउनुभयो । उहाँले महिला जनप्रतिनिधिहरुले महिलाहरुको क्षमता विकास गराउँदै आफु सँगसँगै अगाडी ल्याउनुपर्ने पनि बताउनुभयो । निर्वाचित जनप्रतिनिधिहरुलाई जनतालाई निराश नबनाउन पनि उहाँले आग्रह गर्नुभयो ।
उहाँले भन्नुभयो – ‘यो अवसरलाई कसरी हामीले सदुपयोग गर्ने ? तपाईहरु समाजमा गएर, जनताको सेवामा सर्पपित भएर, जनताको मन जितेर, जनतालाई आकर्षित गरेर, जनतालाई विश्वास दिलाएर तपाईहरु यहाँ आउनुभएको छ । यो जनताको विश्वासलाई, जनताको माया, सद्भावलाई हामीले सम्मान गर्नुपर्ने हुन्छ । जनतालाई निराश बनाउनु हुँदैन । अझ बढी तपाईहरुको दोहोरो भुमिका हुन्छ । एउटा, समाजसेवा, राजनीतिक सेवा । दोस्रो महिलाहरुको क्षमता विकास ।
महिलाहरुलाई पनि आफु सँगसँगै अगाडी ल्याउनुप¥यो । पार्टीले दिएको यो अवसरलाई चुनौतिको रुपमा लिदैँ सामना गर्ने । सामना गर्ने हतियार भनेको हाम्रो विचार हो । तपाईहरु जति उपप्रमुख हुनुभएको छ, सबै भोलिको लागि प्रमुखको लागि तयारी गर्नुहोला । त्यसमा के–के बाधा, अड्चन आउँछन् हामी छौँ । पार्टी छ । समाजका सबै अवरोधहरुलाई सामना गर्नुहोला । सबै अवरोधहरुलाई पन्छाउँदै अगाडी बढ्नु होला । त्यसमा सबैको साथ हुन्छ । सबैको सहयोग मिल्छ ।’
उहाँले राजनीतिक परिवर्तनमा महिलाहरुको भुमिका धेरै रहेको उल्लेख गर्नुभयो । अखिल नेपाल महिला संघ(क्रान्तिकारी)ले शुक्रबार पार्टीबाट निर्वाचित महिला जनप्रतिनिधिहरुलाई पार्टी केन्द्रीय कार्यालयमा एक कार्यक्रमका बिच बधाई तथा अभिनन्दन गरेको छ ।
