काठमाडौँ । नेकपा (एमाले) का सांसद तथा पूर्वपरराष्ट्रमन्त्री प्रदीप ज्ञवालीले अति धेरै गिजोलेर भए पनि एमसीसी पास गरेकोमा सरकारलाई धन्यवाद दिएका छन् ।
प्रतिनिधिसभाको बिहीबारको बैठकमा सरकारको आगामी आर्थिक वर्षको बजेटमाथिको छलफलमा सहभागी हुँदै नेता ज्ञवालीले राजनीतिक ध्येय साँध्नका लागि ठूला योजनाहरूलाई नगिजोल्न सुझाव दिए । उनले विद्युत् परियोजनाहरूलाई नगिजोल्न पनि सरकार र सत्तारुढ दलका नेताहरूलाई आग्रह गरे ।
उनको संकेत बूढीगण्डकी जलविद्युत् परियोजनातर्फ थियो । सो परियोजना चीनलाई बनाउन दिने निर्णय उल्ट्याएर सरकार आफैँले बनाउने निर्णय गरेको छ । उनले भने, “अहिले फेरि त्यसैगरी बुढीगण्डकी गिजोल्दै हुनुहुन्छ । सरकार परिवर्तन भए पनि नीतिको स्थिरता र निरन्तरता हुनुपर्ने हो । नयाँ सरकार आउनेवित्तिकै यस्ता कुराहरुमा परिवर्तन हुँदैन भन्ने अनुमान गर्ने कुरा हो । यो गिजोल्ने कुरामा किन आनन्द आउँछ ? ”
