काठमाडौं । जोमसोम विमानस्थलका लागि पोखराबाट उडेको तारा एयरको ९ एन एईटी ट्विनअटर विमान सम्पर्कविहीन भएको छ । जोमसोम विमानस्थलका एयर ट्राफिक कन्ट्रोलर पुष्कल शर्माले जहाजका पाइलट प्रभाकर घिमिरेले लेतेमाथिको आकाशबाट अन्तिमपटक कुरा गरेको बताए । पाइलट घिमिरेले आफूसँग जोमसोम क्षेत्रको हावाको गतिको विवरण मागेको उनले बताए ।
यसअघि तारा विमानभन्दा पहिला समिट एयरको विमान आइरहेको उनले बताए । “तारा एयरका क्याप्टेन घिमिरेले मसँग जोमसोमको हावाको गति कति छ भनेर माग्नुभएको थियो, मैले घिमिरेलाई हावाको गतिबारे जानकारी दिएपछि म समिटको जहाजलाई अवतरण गराउनतिर लागेँ, त्यसपछि ताराको जहाजलाई सम्पर्क गर्न खोज्दा सम्पर्क नै भएन।”
शर्माका अनुसार घिमिरेलाई जानकारी दिँदा जोमसोमको हावाको गति २५ नटिकल माइल प्रतिघण्टा (४६.३ किमि)को गतिमा थियो। उनले हावाको गति ठिक नभए पनि जोमसोममा यो गतिको हावामा उडान र अवतरण हुनसक्ने उनले बताए । शर्माका अनुसार जोमसोममा ३० नटिकल माइल प्रतिघण्टा (५५.५६ किमि) को गतिमा हावा रहँदासम्म उडान र अवतरण गर्ने गरिएको छ।
