काठमाडौं । प्रतिनिधिसभामाको बैठकमा उद्योग, वाणिज्य तथा आपूर्तिमन्त्री दिलेन्द्रप्रसाद बडुले प्रमुख प्रतिपक्ष दलका नेता केपी ओलीमाथि विभिन्न आरोप लगाएपछि संसद् बैठक अवरुद्ध भएको छ ।
मन्त्री बडुले पूर्वप्रधानमन्त्री एवं प्रतिपक्षदलका नेता ओलीलाई कमिसनमा लिप्त रहेको, सत्ता छाड्नु परेको तथा कुण्ठा व्यक्त गरेको टिप्पणी गर्नुभएको थियो । मन्त्री बडुले ‘साउनको महिनामा दृष्टि गुमाएको गोरूले सधैँ हरियो देख्छ’ भन्ने उखान स्मरण गराउँछुु भन्ने अभिव्यक्ति दिनुभएको थियो ।
उहाँले ओली प्रधानमन्त्री हुँदा कमिसनको चास्नीमा डुबेको आरोपसमेत लगाउनुभयो । उहाँले भन्नुभयो ‘आफू प्रधानमन्त्री हुँदा कमिसन नै कमिसनको चास्नीमा रमाइरहेको अवस्थामा सत्ता गुमाउन परेकोले कमिसनबाहेक के नै देख्न र सोच्न सक्दछ र भन्ने कुरालाई स्मरण गराउँछु । यस कुराले पूर्वप्रधानमन्त्री र प्रतिपक्षी दलका नेताकै व्यक्तित्व र गरिमालाई कति क्षति पुर्याएको छ स्वयं बुझ्ने विषय हो। सत्ता गुमाएको कुण्ठा र रोदन कम गर्न पनि म सुझाव दिन चाहन्छु।’
मन्त्रीको अभिव्यक्तिप्रति आपत्ति जनाउँदै एमालेले नियमापत्ति जनाएको छ । एमालेका प्रमुख सचेतक विशाल भट्टराईले मन्त्रीले व्यक्त गरेका असंसदीय र अमर्यादित शब्द फिर्ता नलिँदासम्म बैठक चल्न नसक्ने बताउनुभएको थियो । एमालेको विरोधपछि १५ मिनेटको लागि बैठक रोकिएको छ ।
