काठमाडौँ । जुम्लाको कनकासुन्दरी गाउँपालिका–८ मा दलित समुदायका स्वतन्त्र उम्मेदवारको प्यानलै विजयी भएको छ ।
वडाध्यक्षका उम्मेदवार धनबहादुर कामीको प्यानलै विजयी भएको हो । उनले २८८ मतसहित विजय हासिल गरेका हुन् । कामीसँग नेपाली कांग्रेसका उम्मेदवार कप्तानबहादुर शाही २२० मत ल्याएर पराजित भए ।
वडा सदस्यमा स्वतन्त्र उम्मेदवार गोल दमाई र कर्णजीत सार्की तथा महिला सदस्यमा काँग्रेसकी रामुदेवी काफ्लेले बाजी मारेका छन् । दलित महिला सदस्यमा स्वतन्त्र उम्मेदवार चनाखी कुलालले जित हासिल गरिन् ।
दलित समुदायले एकता गरेर स्वतन्त्र उम्मेदवारका रुपमा धनबहादुरलाई स्वतन्त्र उम्मेदवारका रुपमा उठाएका थिए । सो वडाको निर्वाचनमा तीन सदस्य र एक वडाध्यक्ष पदमा स्वतन्त्र उम्मेदवार उठाएका थिए ।
मुलुकमा संघीयता आए पनि दलितको मुक्ति नभएको भन्दै दलित मुक्तिका लागि दलितकै नेतृत्व आवश्यक ठानी दलितहरुको समूहले स्वतन्त्र उम्मेदवारी दिएको थियो । उनीहरुले कुनै पनि दलको टिकन नलिई दलित समूहबाटै स्वतन्त्र उम्मेदवारलाई उठाएका थिए ।
