काठमाडौँ । मिस्टर बिनको भूमिकामा विश्वभर करोडौँ प्रशंसक बनाइसकेको हलिउड कलाकार रोवन अट्किन्सनका बारेमा आएको एउटा समाचारले प्रशंसकहरुलाई तनाव बनाइदियो । रोवनको ६६ वर्षको उमेरमा निधन भयो भन्ने समाचार थियो । सो समाचार आउने बित्तिकै प्रशंसकबीच तनाव उत्पन्न गर्यो र मानिसहरुले सामाजिक सञ्जालमा के साँच्चै रोवनको मृत्यु भएको हो भनेर सोध्न थाले । कतिले समाचारको सत्यताको अनुसन्धान नै नगरी उनलाई श्रद्धाञ्जलि दिन थाले । यसपछि सबैले रोवन अट्किन्सन सामाजिक सञ्जालमा ट्रेन्ड गर्न थाले ।
अहिले नयाँ समाचारले प्रशंसकहरुलाई राहत दिनसक्छ । मिस्टर बिनको निधनको खबरहरु सत्य नभएर हल्ला मात्र हो । उनी जीवित मात्र नभएर पूरै स्वस्थ पनि छन् । एक रिपोर्टका अनुसार अमेरिकी न्युज च्यानल फक्स न्युज भएको दाबी गर्ने एक ट्विटर ह्यान्डलले उनको मृत्युको खबर फैलाएको थियो । सोही ट्विटरबाट रोवनको मृत्युको समाचार आगोसरी फैलियो । सो नक्कली ट्विटर ह्यान्डलमा गरिएको ट्विटमा एउटा स्पाम लिङ्क पनि दिइएको थियो र सो लिङ्कमा क्लिक गर्ने मानिसहरु भावुक हुँदै सो स्पामको शिकार भए । यद्यपि रोवनको मृत्युको झुटो समाचार यसरी नै फैलिएको यो नै पहिलो पटक होइन ।
मिस्टर बिनका अतिरिक्त कयौँ कलाकारको मृत्यु भएको झुटो समाचार सामाजिक सञ्जालमा आइरहेका छन् । भारतीय सिनेमाका ट्रेजेडी किङ दिलीप कुमार पनि यस्तै हल्लाको शिकार कयौँ पटक भएका थिए । मिस्टर बिन पहिलोपटक टिभीमा सन् १९९० मा देखाइएको थियो । त्यसपछि विस्तारै रोवन विश्वभर चर्चित हुँदै गए ।
