काठमाडौं । प्रदेश ३ सरकारले विषादी अवशेष परीक्षण प्रयोगशाला सुरु गरेको छ । प्रदेशका पाँच जिल्लामा त्यस्ता प्रयोगशाला स्थापना गरी सोमबारबाटै परीक्षणसमेत सुरु भएको छ । प्रदेश सरकारले पाँच जिल्लामा ३६ लाख रुपैयाँ लगानीमा विषादी अवशेष प्रयोगशाला र प्रति प्रयोगशाला ३२ लाखको लागतमा माटो परीक्षण प्रयोगशाला स्थापना गरेको हो । यसबाहेक सोमबारबाट १२ हजार कृषक परिवारलाई लाभान्वित गराउने गरी ८० लाखको लागतमा घुम्ती माटो परीक्षण प्रयोगशालासमेत सुरु गरिएको छ ।
दैनिक उपभोग्य कृषि उपजको उत्पादनमा विषादीको प्रयोग बढ्दै जाँदा उत्पादक, उपभोक्ता तथा समग्र वातावरणमा नकारात्मक प्रभाव परिरहेको अवस्थालाई मध्यनजर गर्दै प्रयोगशाला सञ्चालन गरिएको मुख्यमन्त्री डोरमणि पौडेलले जानकारी दिए । प्रदेश सरकारले आर्थिक वर्ष ०७५र७६ को नीति तथा कार्यक्रममा विषादी परीक्षण प्रयोगशाला स्थापना र सञ्चालन गर्ने उल्लेख गरेको थियो । त्यसका लागि केहीअघि ‘विषादी अवशेष द्रुत विश्लेषण कार्याविधि, २०७५’ स्वीकृत गरेको थियो ।
माटो तथा मल परीक्षण प्रयोगशाला, हेटौँडा, मकवानपुर, चितवन, ललितपुर, काभ्रे र नुवाकोटमा विषादी अवशेष परीक्षण प्रयोगशाला स्थापना गरिएको हो । प्रयोगशाला व्यवस्थित र चुस्त राख्न प्रत्येक कार्यालयका तीन–तीनजना प्राविधिकलाई तालिमसमेत उपलब्ध गराइएको भूमि व्यवस्था, कृषि तथा सहकारी मन्त्रालयका प्रवक्ता निर्मल गदालले जानकारी दिए ।
प्रयोगशाला उद्घाटन गर्दै मुख्यमन्त्री पौडेलले निर्वाहमुखी कृषिलाई व्यावसायिक बनाएर कृषि उपजको आयात रोक्नुपर्ने बताए । उनले प्रदेश सरकारको पाँच खम्बे अर्थ नीतिमध्ये कृषि सबैभन्दा महत्वपूर्ण रहेको धारणा व्यक्त गरे । प्रयोगशालाले प्रति घण्टा ३० वटा तरकारी तथा फलफूलहरूका नमुना परीक्षण गरी प्रतिवेदन दिन सक्नेछ ।, समाचार नयाँ पत्रिका दैनिकमा प्रकाशित छ ।
