सुनसरी । सहकारीमा बचत गरेको करोडौं रुपैयाँ अपचलन गरी असार २३ गतेदेखि ‘बेपत्ता’ भएका धरान–१२ स्थित सल्लेरी बचत तथा ऋण सहकारी संस्थाका अध्यक्ष कृष्ण दर्नाल विश्वकर्मा बुटवलबाट पक्राउ परेका छन् ।
इलाका प्रहरी कार्यालय धरानका डिएसपी ढुण्डीराज न्यौनेका अनुसार फरार भएपनि विश्वकर्मा बुटवलमा लुकिछिपी बस्दै आएका थिए । फरार रहेका उनको खोजीलाई प्रहरीले तिब्र बनाएको थियो ।पक्राउ परेका विश्वकर्माले बचतकर्ताको रकम अपचलन गर्न आफ्नो छोरा मोहनलाई प्रबन्धक र साली कमलादेवी विकलाई लेखा प्रमुख बनाएको रहस्य पनि खुलेको छ ।
मोहन र कमला यसअघि नै पक्राउ परेका थिए । तीनजनाको मिलोमतो अनुसार बचतकर्तालाई सहकारीको पासवुक बनाइदिएपनि अधिकांशको नाम सहकारीमा दर्ता नगरी अध्यक्ष कृष्णको नाममा रहेको शिखर सगरमाथा ज्वेलरी प्रालिमा लगानी गरेको रहस्य पनि खुलेको छ । शिखर सगरमाथा उनका माइला छोरा महेश दर्नालले हेर्ने गरेका थिए । उनी हाल फरार छन् ।
प्रहरीले गरेको अनुसन्धानबाट शिखर सगरमाथा सहकारी संस्थामा सर्वसाधारणले बचत गरको रकम विकले सञ्चालन गरको शिखर समरमाथा ज्वेलरी प्रा.लि. लगानी गर्ने गरेको पाइएको छ । प्रहरीका अनुसार बुटवलस्थित विश्वकर्माको डेराबाट सुनजस्तो देखिने धातुको गरगहनाहरु १६३.२९६ ग्राम र चाँदी जस्तो देखिने धातु २७९.९३६ ग्राम समेत बराबद गरेको छ ।
यसअघि असार २४ गते उनका छोरा मोहनले बाबु कृष्ण हराएकाले खोजतलास गरिपाउँ भनेर इलाका प्रहरी कार्यालय धरानमा निवेदनसमेत दिएको नाटक पनि गरेका थिए ।प्रहरीले अध्यक्ष विश्वकर्माले छोराहरु र सालीसँग मिलेर सहकारीको रकम हिनामिना गरेको भन्दै ८५ जना बचतकर्ताहरुले उजुरी दिएको जनाएको छ ।
उनिमाथि बचतकर्ताहरुले ६ करोड ३ लाख २० हजार ६ सय ६५ रुपैया हिनामिना गरेको आरोप रहेको छ ।यसअघि अध्यक्ष विक वेपत्ता भएलगतै उपाध्यक्ष विष्णुकुमारी श्रेष्ठसहित १२ जना सञ्चालक समितिका सदस्यहरुले हिसाव किताव खोजीनीति गर्न धरान उपमहानगरको सहकारी विकास समितिमा निवेदन दिएका थिए । त्यसपछि उपमहानगरपालिकाले टंक सुवेदीको संयोजकत्वमा छानविन समिति गठन गरेको थियो । समितिले सहकारीका अध्यक्ष कृष्ण, प्रबन्धक मोहन र शिखर सगरमाथा ज्वेलरी प्रालिले बदमासी गरेको ठहर गरेको प्रतिवेदन बनाएको थियो ।
