काठमाडौं । नेकपा (एमाले)का अध्यक्ष केपी शर्मा ओलीले आगामी निर्वाचनमा पनि एमालेविरुद्ध राजनीतिक मोर्चाबन्दी हुन सक्ने भन्दै पार्टीमाथि भइरहेको घेराबन्दीको एकजुट भएर प्रतिवाद गर्न नेता तथा कार्यकर्तालाई निर्देशन दिनुभएको छ।
पार्टी कार्यालय च्यासलमा सोमबार आयोजित केन्द्रीय सदस्यहरूको शपथग्रहण कार्यक्रममा उहाँले एमालेविरुद्धको घेराबन्दी २०७७ सालदेखि नै सुरु भएको दाबी गर्नुभयो। पार्टी कब्जा गरेर ध्वस्त पार्ने प्रयास असफल भएपछि २०७८ साल भदौ १० गते पार्टी विभाजन गराइएको उहाँको आरोप थियो।
२०७९ सालको निर्वाचनमा विभिन्न राजनीतिक दलले एमालेविरुद्ध मोर्चाबन्दी गरेको उल्लेख गर्दै ओलीले त्यस्तो परिस्थितिमा पनि एमाले लोकप्रिय पार्टी बनेको दाबी गर्नुभयो। उहाँले आगामी निर्वाचनमा पनि एमालेविरुद्ध घेराबन्दी हुन सक्ने भन्दै पार्टीलाई थप बलियो बनाउन एकताबद्ध भएर अघि बढ्नुपर्ने बताउनुभयो।
सामाजिक सञ्जालमार्फत पार्टी र नेताहरूको चरित्रहत्या गर्ने तथा जनतामाझ अलोकप्रिय बनाउने प्रयास अहिले पनि जारी रहेको उहाँको आरोप थियो। पार्टीभित्रकै केही नेताका गतिविधिले चुनौती थपिएको उल्लेख गर्दै ओलीले विगतका विवादमा अल्झिनुभन्दा सुदृढ एकताका साथ अघि बढ्नुपर्नेमा जोड दिनुभयो।
‘हाम्रो अगाडि निर्वाचन आउँदैछ र यस निर्वाचनमा पनि हामीलाई घेर्ने काम हुन सक्छ, हामीविरुद्धको घेराबन्दी सिद्धिएको छैन,’ उहाँले भन्नुभयो, ‘पार्टीमा सुदृढ एकताका साथ अगाडि बढ्नुपर्छ। आजको आवश्यकता त्यही हो।’
ओलीले एमाले ‘समृद्ध नेपाल, सुखी नेपाली’ बनाउने उद्देश्यका साथ अघि बढेको पार्टी भएको उल्लेख गर्दै सानातिना विवाद र गलत गतिविधिमा अल्झिन नहुने बताउनुभयो। पार्टीभित्र सहमति र एकताको वातावरण बनाउनुपर्ने उहाँको भनाइ थियो।
यसैगरी, अध्यक्ष ओलीले नेपालमा लोकतन्त्र कमजोर बनाउने काम भइरहेको आरोप लगाउनुभयो। राष्ट्रिय अस्मितामा आँच पुर्याएर मुलुकको स्वाधीनता र स्वतन्त्रता कमजोर पारिएको दाबी गर्दै उहाँले ती उपलब्धिको पुनःस्थापनाका लागि आन्दोलनमा उत्रिनुपर्ने अवस्था आउन सक्ने बताउनुभयो।
आन्दोलनका क्रममा दमन भए त्यसको प्रतिवाद गर्नुपर्ने उल्लेख गर्दै ओलीले आन्दोलन न्याय, शान्ति र अग्रगमनका लागि हुनुपर्ने धारणा राख्नुभयो। उहाँले आगजनी र लुटपाटलाई आन्दोलनको संज्ञा दिन नहुने बताउँदै बलियो र संगठित शक्तिले कमजोर तथा निहत्था जनतामाथि दमन गरे त्यसको प्रतिवाद गर्नु नै आन्दोलन भएको तर्क गर्नुभयो।
‘आगो लगाउनु आन्दोलन होइन, लुटपाट गर्नु आन्दोलन होइन,’ उहाँले भन्नुभयो, ‘गलतका विरुद्ध, अग्रगमनका लागि, न्यायका लागि, शान्तिका लागि र दमनका विरुद्ध आन्दोलन गर्नुपर्ने हुन्छ।’
ओलीले पार्टीका सदस्यहरूलाई निष्ठापूर्वक सक्रियताका साथ काम गर्न पनि निर्देशन दिनुभयो। अब पार्टीमा विगतको योगदानका आधारमा मात्रै मूल्यांकन नहुने उल्लेख गर्दै उहाँले नीति र नेतृत्वप्रतिको इमानदारिता तथा कर्मशीलतालाई समेत मूल्यांकनको आधार बनाइने बताउनुभयो।
पार्टीलाई बलियो बनाउन नेता तथा कार्यकर्ताले जिम्मेवारीपूर्वक काम गर्नुपर्नेमा जोड दिँदै उहाँले एकता, अनुशासन र सक्रियतालाई आगामी राजनीतिक यात्राको महत्वपूर्ण आधारका रूपमा प्रस्तुत गर्नुभयो।
