गुल्मी । गुल्मीको धुर्कोट गाउँपालिका–५ मा लत्रिएको बिजुलीको तारमा करेन्ट लागेर एकजनाको मृत्यु भएको छ ।
मृत्यु हुनेमा स्थानीय ऋषिराम भण्डारी रहेका छन् । स्थानीय सिमलचौरस्थित आफ्नै खेत नजिकै लत्रिएको बिजुलीको तारमा परी भण्डारीको मृत्यु भएको जिल्ला प्रहरी कार्यालय गुल्मीले जनाएको छ ।
प्रहरीका अनुसार भण्डारी मंगलबार दिउँसो सिमलचौर र चापटारीस्थित खेतमा पानी लगाउन भन्दै घरबाट निस्किनुभएको थियो । साँझसम्म घर नफर्किएपछि आफन्त तथा छरछिमेकीले उहाँको खोजी गरेका थिए ।
खोजीका क्रममा बुधबार बिहान खेत नजिकै लत्रिएको बिजुलीको तारमा परी मृत्यु भएको अवस्थामा भण्डारीलाई फेला पारिएको जिल्ला प्रहरी कार्यालय गुल्मीका प्रहरी नायब उपरीक्षक वीरेन्द्रवीर विश्वकर्माले जानकारी दिनुभयो ।
घटनाबारे थप अनुसन्धान भइरहेको प्रहरीले जनाएको छ।
