काठमाडौँ। राष्ट्रिय रग्बी टोलीका पूर्वकप्तान कृष्ण थापा नेपाली सेनाको रग्बी प्रशिक्षकमा नियुक्त हुनुभएको छ ।
नेपाली सेनाले उहाँलाई सेनाको महिला र पुरुष दुबै टोली हेर्नेगरी प्रशिक्षक नियुक्त गरेको हो । न्युजिल्यान्ड र अस्ट्रेलियाबाट ‘कोचिङ एक्सपोजर’ प्रशिक्षण लिएर फर्कनुभएका थापासँग अन्तरराष्ट्रिय र घरेलु प्रशिक्षणको लामो अनुभव छ ।
खेलाडीको रूपमा थापाले राष्ट्रिय रग्बी सेभेन्स र फिफ्टिन्स दुबैमा कप्तानीको भूमिका निर्वाह गरिसक्नुभएको छ । उहाँले राष्ट्रिय यु–१८ क्रिकेट टोलीका प्रशिक्षको भूमिका निर्वाह गरिसक्नुभएको छ । उहाँको प्रशिक्षणमा युवा टोलीले भारत र बङ्गलादेशलाई पराजित गरेको थियो ।
त्यसैगरी उहाँकै प्रशिक्षणमा राष्ट्रिय सेभेन्स ब्वाइज टिमले सन् २०२३ मा बङ्गलादेशलाई पराजित गरेको थियो । जुन नेपाली रग्बीको पहिलो अन्तरराष्ट्रिय जित पनि थियो । उहाँले यु–१४ एसियन एक्सचेञ्ज फेस्ट जापानमा प्रशिक्षकको भूमिका निर्वाह गर्नुभएको थियो ।
राष्ट्रिय तहमा उहाँ लुम्बिनी प्रदेश र कर्णाली प्रदेशका प्रशिक्षक रहिसक्नुभएको छ । उहाँको प्रशिक्षणमा लुम्बिनीले नवौँ बृहत राष्ट्रिय खेलकुदमा रजत पदक जितेको थियो भने कर्णाली प्रदेशले रारा सेभेन्स, पोखरा सेभेन्स र बागमती सेभेन्स च्याम्पियन बनेको थियो ।
थापा नेपाली रग्बीको चर्चित क्लब गोर्खाली रग्बी क्लबका उपाध्यक्ष र प्रशिक्षक पनि हुनुहुन्छ । गोर्खाली क्लबले उहाँको नेतृत्वमा थुप्रै उपाधी जितेका छन् । खेलाडीका रूपमा कृष्णको कार्यकालमा थुप्रै उपलब्धि हात पारेका छन् । जसमा सन् २०२२ मा बङ्गलादेशमा खेलेको रग्बी–१५ खेललाई नेपाली रग्बी विकासको ठूलो फड्को मानिन्छ ।
सात खेलाडी सम्मिलित रग्बी सेभेन्स मात्र खेलिरहेको नेपालले त्यो बेला ढाकामा ‘बङ्गबन्धु बङ्गलादेश नेपाल अन्तरराष्ट्रिय रग्बी शृङ्खला’ खेल्यो, जुन १५ जना खेलाडीले खेल्ने ‘रग्बी–१५’ मा नेपालको पहिलो सहभागिता थियो ।
उक्त प्रतियोगिता खेलेसँगै नेपालले विश्व रग्बी महासङ्घबाट पूर्ण सदस्यता प्राप्त गरेको थियो भने नेपालले अन्तरराष्ट्रिय रग्बीमा डिभिजन–३ खेल्ने राष्ट्रको रूपमा प्रवेश पाएको थियो । त्यस्तै खेलाडीका रूपमा उहाँले सन् २०१६ मा कतारमा एसियन रग्बी च्याम्पियनसिप र सिङ्गापुरमा एसियन रग्बी च्याम्पियनसिप २०१७ तथा ताइवानमा युनिभर्सियाड २०१७ मा भाग लिएको थियो । रासस
