काठमाडौं । आम जनता पार्टीका अध्यक्ष प्रभु साहले भन्सार नियन्त्रणका नाममा सीमा क्षेत्रमा सर्वसाधारणको निजी सम्पत्ति खोस्ने र दुःख दिने काम भइरहेको आरोप लगाउनुभएको छ ।
पार्टीको आइतबारदेखि सुरु भएको केन्द्रीय समितिको पूर्ण बैठकलाई सम्बोधन गर्दै अध्यक्ष साहले भारतबाट स्थलमार्ग हुँदै घरायसी प्रयोजनका लागि ल्याइने सामान्य सामग्रीमा समेत सरकारले भन्सार लगाउने गरेको बताउनुभयो । तर हवाईमार्गबाट आउने व्यक्तिले लाखौँ रुपैयाँका सामान ल्याउँदा सहजै ल्याउन पाउने अवस्था रहेको उहाँको आरोप थियो ।
भन्सार नियन्त्रणका नाममा सर्वसाधारणको निजी सम्पत्ति खोस्ने काम तत्काल रोक्नुपर्ने उहाँले बताउनुभयो । सीमा सुरक्षाका नाममा तराईका सीमावर्ती क्षेत्रमा सशस्त्र प्रहरीको संख्या र क्याम्प बढाइएकोप्रति समेत असन्तुष्टि जनाउँदै साहले सीमा भारतसँग मात्रै नभई चीनसँग पनि जोडिएको स्मरण गराउनुभयो ।
सीमा सुरक्षा गर्ने हो भने हिमाली तथा पहाडी क्षेत्रमा पनि समान रूपमा सुरक्षाकर्मी परिचालन गर्नुपर्ने उहाँको भनाइ थियो । सुस्ता र कालापानीलगायतका सीमा क्षेत्रमा सुरक्षा उपस्थिति बढाउनुपर्नेमा सर्वसाधारणलाई दुःख दिने गरी तराईका नाकामा मात्रै सशस्त्र प्रहरीको संख्या र क्याम्प बढाइएको उहाँले आरोप लगाउनुभयो ।
अध्यक्ष साहले किसानको अवस्था दयनीय रहेको भन्दै सरकारले मलखाद, बजार र उत्पादनको उचित मूल्य सुनिश्चित गर्न नसकेको पनि बताउनुभयो । किसानले उखु, मकै लगायतका कृषि उपज बिक्री गरे पनि लामो समयसम्म भुक्तानी नपाउने अवस्था रहेको भन्दै उहाँले किसानको उत्पादनको बजार र उचित मूल्य सुनिश्चित गर्नु सरकारको दायित्व भएको बताउनुभयो ।
त्यस्तै, सहकारी तथा लघुवित्त पीडितसँग सरकारले गरेका सम्झौता कार्यान्वयन नभएको साहले आरोप लगाउनुभयो । सम्झौता गर्ने तर कार्यान्वयन नगर्ने प्रवृत्तिले सरकारप्रति जनताको विश्वास घट्दै गएको भन्दै उहाँले पीडितसँग गरिएका सम्झौता तत्काल कार्यान्वयन गर्न माग गर्नुभयो ।
अध्यक्ष साहले वर्तमान सरकारसँग रहेको दुई तिहाइको राजनीतिक शक्तिलाई जनताले अनुभूति गर्ने परिणाममा बदल्नुपर्नेमा जोड दिनुभयो । तर सरकारले आफ्नो शक्ति काम र परिणाममा देखाउन नसकेको उहाँको आरोप थियो ।
सरकारले १०० दिनमा १०० वटा काम गर्ने घोषणा गरे पनि ६ महिना बितिसक्दा ती प्रतिबद्धता पूरा हुन नसकेको उहाँले बताउनुभयो । सरकार आफैँले १०० दिनपछि गरेको कार्यसम्पादन मूल्यांकनसमेत उत्तीर्ण हुन नसकेको दाबी गर्दै साहले जनतासँग गरिएका प्रतिबद्धता पूरा गर्न सरकारलाई आग्रह गर्नुभयो ।
