काठमाडौँ । प्रतिनिधि सभाको दोस्रो अधिवेशन शुक्रबार औपचारिक रूपमा सम्पन्न भएको छ ।
गत वैशाख २८ गतेदेखि असोज १६ गतेसम्म १४५ दिन सञ्चालन भएको अधिवेशनमा ६२ दिनमा ६८ वटा बैठक बसेका छन् । अधिवेशन अवधिमा २७७ घण्टा ३० मिनेट संसदीय समय व्यतीत भएको संसद् सचिवालयले जनाएको छ ।
अधिवेशनको समापन गर्दै सभामुख डोलप्रसाद अर्यालले संसद्ले यस अवधिमा १२ वटा विधेयक पारित गर्नुका साथै विपद् व्यवस्थापनलगायत जनसरोकारका विषयमा महत्वपूर्ण भूमिका निर्वाह गरेको जानकारी दिनुभयो ।
विधायकी कामकारबाहीका दृष्टिले अधिवेशनमा आर्थिक विधेयक २०८३, विनियोजन विधेयक २०८३ तथा सम्पत्ति शुद्धीकरण निवारण तथा केही ऐनलाई संशोधन गर्न बनेको विधेयकलगायत १२ वटा विधेयक पारित भएका छन् । तीमध्ये ११ वटा विधेयक राष्ट्रपतिबाट प्रमाणीकरण भइसकेका छन् । त्यस्तै, २० वटा विधेयक विभिन्न संसदीय समितिमा विचाराधीन रहेका छन् भने केही विधेयक प्रक्रियामा रहेका छन् ।
अधिवेशनले सरकारको नीति तथा कार्यक्रम पारित गर्नुका साथै राजस्व र व्ययको वार्षिक अनुमानमाथि विस्तृत छलफल गरी बजेट कार्यान्वयनको बाटोसमेत खुलाएको थियो । विभिन्न संवैधानिक निकायका वार्षिक प्रतिवेदन सभामा पेश भएका थिए भने सरकारका मन्त्रीहरूले सांसदहरूले उठाएका जनसरोकारका विषयमा प्रश्नोत्तरमार्फत जवाफ दिएका थिए ।
यस अधिवेशनको महत्वपूर्ण पक्षका रूपमा बाढी–पहिरो प्रभावितको उद्धार, राहत तथा पुनःस्थापनाका विषयमा सरकारलाई दिइएको निर्देशनलाई लिइएको छ । भोटेकोसी र त्रिशूली नदीमा आएको बाढीबाट भएको जनधनको क्षतिप्रति प्रतिनिधि सभाले गहिरो दुःख व्यक्त गर्दै विशेष प्रस्तावसमेत पारित गरेको थियो ।
त्यस्तै, जलवायु परिवर्तनको प्रभाव र विपद् व्यवस्थापनका विषयमा अध्ययन तथा आवश्यक सुझाव दिन १५ सदस्यीय विशेष संसदीय समिति गठन गरिएको थियो ।
