काठमाडौं । श्रम, संस्कृति पार्टीले संसद्मा उठाइएका जनसरोकारका विषय र प्रतिपक्षी दलका मागप्रति सरकार गम्भीर नबनेको आरोप लगाएको छ।
प्रतिनिधिसभाको शुक्रबार बसेको बैठकमा पार्टीका सांसद ध्रुव राईले संसद्मा पटक–पटक जनताका समस्या र समसामयिक विषय उठाइए पनि सरकारले त्यसको प्रभावकारी सम्बोधन नगरेको गुनासो गरे।
उनले प्रतिपक्षी दलका सांसदहरूले जनतासँग जोडिएका विभिन्न प्रश्न सरकारसमक्ष राखे पनि ती प्रश्नको जवाफ पाउन नसकेको बताए। उनका अनुसार संसद्को पछिल्लो अधिवेशन पनि औपचारिकतामा सीमित भएको देखिएको छ।
सांसद राईले सरकार प्रमुखले प्रतिपक्षी दलका आवाज र मागलाई सम्मानपूर्वक सम्बोधन गर्न नसकेको टिप्पणी गरे।
उनले जनताले विश्वास गरेर निर्वाचित गरेका राजनीतिक दलहरू अहिले जनअपेक्षाअनुसार अघि बढ्न नसकेको समेत बताए।‘सरकार प्रमुखले जिम्मेवार ढङ्गले प्रस्तुत हुनुको साटो प्रतिपक्षी दलहरूको जित र आवाजलाई सम्मान गर्न सकेनन्,’ उनले भने, ‘सबै सांसद आ–आफ्नो ठाउँमा सक्षम हुनुहुन्छ, तर सरकारले विपक्षीको आवाज सुन्नसमेत चाहेन।’
उनले संसद्मा उठाइएका प्रश्नलाई बेवास्ता गर्ने प्रवृत्तिले जनताका समस्या समाधान गर्नेभन्दा संसद्को भूमिकालाई औपचारिकतामा सीमित गर्ने अवस्था सिर्जना गरेको बताए।
