काठमाडौं । नेपाल विद्युत् प्राधिकरणले लगातारको वर्षा, बाढी र पहिरोका कारण प्रभावित भएको विद्युत् आपूर्ति मंगलबारसम्म देशभर सहज हुने जनाएको छ ।
सोमबार काठमाडौंमा आयोजित पत्रकार सम्मेलनमा प्राधिकरणका कार्यकारी निर्देशक दीर्घायुकुमार श्रेष्ठले बाढी प्रभावित जिल्लाहरूमा मंगलबारसम्म विद्युत् आपूर्ति नियमित हुने जानकारी दिनुभयो ।
उहाँका अनुसार लगातारको वर्षा र त्यसपछिको बाढीपहिरोका कारण आइतबार देशभर करिब एक हजार मेगावाट विद्युत् प्रणालीबाट बाहिरिएको थियो । अधिकांश विद्युत् पुनः प्रणालीमा जोडिसकिएको उहाँले बताउनुभयो ।
बाढीका कारण म्याग्दी, बागलुङ, मुस्ताङ, तनहुँ, रुकुम पूर्व र प्युठानलगायतका जिल्लामा विद्युत् आपूर्ति पूर्ण रूपमा अवरुद्ध भएको थियो । तीमध्ये म्याग्दी, बागलुङ, तनहुँ र रुकुम पूर्वमा विद्युत् सेवा सुचारु भइसकेको प्राधिकरणले जनाएको छ । मुस्ताङ, प्युठान र रोल्पामा सोमबार साँझसम्म तथा देशभर मंगलबारसम्म विद्युत् आपूर्ति सहज हुने श्रेष्ठले बताउनुभयो ।
बाढीका कारण प्राधिकरणको सहायक कम्पनीमार्फत प्रवर्द्धित ४० मेगावाट क्षमताको राहुघाट जलविद्युत् आयोजनाको बाँध तथा टेलरेस गेटमा क्षति पुगेको छ । आयोजनाको टर्बाइन फ्लोरमा समेत पानी पसेकाले सरसफाइ तथा मर्मतपछि सञ्चालनमा ल्याउन करिब १० दिन लाग्ने उहाँले जानकारी दिनुभयो ।
प्रसारणतर्फ कालीगण्डकी करिडोरको २२० केभी प्रसारण लाइनअन्तर्गत म्याग्दीको दाना–कुश्मा खण्डका टावर नम्बर २१ र २२ मा क्षति पुगेको छ । उक्त क्षतिका कारण त्यस क्षेत्रमा रहेका सातवटा जलविद्युत् केन्द्रबाट उत्पादन हुने करिब १९० मेगावाट विद्युत् प्रसारण हुन सकेको छैन ।
श्रेष्ठका अनुसार प्रणालीबाट बाहिर रहेका आठवटा आयोजनाको कुल क्षमता २३० मेगावाट रहेको छ । राहुघाट जलविद्युत् आयोजनाको ४० मेगावाट बाहेक राहुघाट सबस्टेसनसँग जोडिएका आयोजनाबाट १२७ मेगावाट उत्पादन सञ्चालनमा ल्याउन सकिने अवस्थामा पुगेको उहाँले बताउनुभयो ।
यसैगरी, बाढीका कारण अवरुद्ध सेती र मादी करिडोरका कुल २६२ मेगावाट क्षमताका जलविद्युत् केन्द्र सञ्चालनमा आइसकेका छन् । मर्स्याङ्दी करिडोरका १९० मेगावाट क्षमताका जलविद्युत् केन्द्र पनि सञ्चालनमा आइसकेको प्राधिकरणले जनाएको छ ।
बाढीका कारण अवरुद्ध १४४ मेगावाट क्षमताको कालीगण्डकी ‘ए’ जलविद्युत् केन्द्रसमेत सोमबार पिक समयमा सञ्चालनमा आउने श्रेष्ठले जानकारी दिनुभयो ।
वितरण लाइनतर्फ वर्षाका कारण म्याग्दी, मनाङ, बागलुङ, मुस्ताङ, तनहुँ, रुकुम पूर्व र प्युठानमा विद्युत् सेवा प्रभावित भएको थियो । बाढीले वितरण संरचना बगाउनुका साथै विद्युत्का टावर ढालेपछि ठूलो परिमाणमा विद्युत् प्रणालीबाट बाहिरिएको प्राधिकरणले जनाएको छ ।
प्राधिकरणका कार्यकारी निर्देशक श्रेष्ठले प्रणालीबाट बाहिरिएका विद्युत् आयोजनालाई पुनः सञ्चालनमा ल्याउन प्राधिकरण सक्रिय रूपमा काम गरिरहेको बताउनुभयो ।
