काठमाडौं । राष्ट्रिय स्वतन्त्र पार्टी (रास्वपा) संसदीय दलले सांसदका स्वकीय सचिवहरूका लागि अभिमुखीकरण कार्यक्रम आयोजना गरेको छ ।
संसद् सदनभित्रको उपस्थितिले मात्रै प्रभावकारी रूपमा सञ्चालन नहुने भन्दै जनप्रतिनिधिको कामलाई प्रभावकारी बनाउन सही सूचना, व्यवस्थित समन्वय, जिम्मेवार टिम र स्पष्ट कार्यप्रणाली आवश्यक रहेको रास्वपाले जनाएको छ । यही उद्देश्यले स्वकीय सचिवहरूको भूमिका र जिम्मेवारीबारे अभिमुखीकरण कार्यक्रम आयोजना गरिएको हो ।
कार्यक्रममा रास्वपा संसदीय दलका मुख्य सचेतक कविन्द्र बुर्लाकोटीले पार्टीको विचार, अनुशासन तथा स्वकीय सचिवको जिम्मेवारी र कर्तव्यबारे धारणा राख्नुभएको थियो ।
सचेतक प्रकाशचन्द्र परियारले स्वकीय सचिवको भूमिका, संसदीय अभ्यासमा यसको महत्व तथा सांसदको कामलाई प्रभावकारी बनाउन स्वकीय सचिवले खेल्ने भूमिकाबारे जानकारी गराउनुभएको थियो ।
त्यस्तै, सचेतक क्रान्तिशिखाले स्वकीय सचिवहरूले उठाएका विभिन्न जिज्ञासा, प्रश्न तथा व्यावहारिक चुनौतीबारे छलफल गर्दै आवश्यक स्पष्टता प्रदान गर्नुभएको थियो ।
