आर्थिक मामिला तथा योजना मन्त्रालयमा भएको भेटमा रसुवाको भोटेकोशी बाढीबाट प्रभावित परिवारको पुनःस्थापना, जीविकोपार्जन तथा रोजगारी सिर्जनाका लागि सार्वजनिक–निजी साझेदारी (पीपीपी) मोडलमार्फत सहकार्य गर्ने विषयमा छलफल भएको हो ।
महासंघ बागमती प्रदेशका अध्यक्ष वेदबहादुर श्रेष्ठ, कोषाध्यक्ष रुद्रबहादुर खत्री तथा कार्यकारी निर्देशक विवेक मानन्धरसहितको टोलीले मन्त्री पौडेलसँग भेट गरेको थियो ।
भेटका क्रममा मन्त्री पौडेलले विपद्बाट प्रभावित नागरिकको पुनःस्थापना तथा आर्थिक पुनरुत्थानका लागि प्रदेश सरकार, निजी क्षेत्र र अन्य सरोकारवाला पक्षबीचको सहकार्यलाई थप सुदृढ गर्दै ठोस तथा परिणाममुखी कार्यक्रम अघि बढाउने प्रतिबद्धता जनाएका थिए ।
प्रभावित परिवारलाई दीर्घकालीन रूपमा आत्मनिर्भर बनाउने उद्देश्यले आवश्यक नीतिगत तथा कानुनी प्रक्रियाको अध्ययन गरी उपयुक्त कार्यविधि निर्माण गर्ने र निजी क्षेत्रको सहभागितालाई प्रभावकारी रूपमा परिचालन गर्ने विषयमा समेत छलफल भएको अध्यक्ष श्रेष्ठले जानकारी दिए ।
महासंघ बागमती प्रदेशलाई हेटौंडामा एक कठ्ठा जग्गा
यसैबीच, नेपाल उद्योग वाणिज्य महासंघ बागमती प्रदेशको सचिवालय भवन निर्माणका लागि आवश्यक जग्गा प्राप्त भएको छ ।
महासंघ बागमती प्रदेशका जिल्ला–नगर उपाध्यक्ष तथा मकवानपुर उद्योग वाणिज्य संघका निवर्तमान अध्यक्ष कृष्णकुमार गुप्ताका छोरा अमित अग्रवालको नाममा हेटौंडा उपमहानगरपालिका–१७ मा रहेको एक कठ्ठा जग्गा नेपाल उद्योग वाणिज्य महासंघ बागमती प्रदेशको नाममा नामसारी गरिएको महासंघले जनाएको छ ।
भूमि प्रशासन कार्यालयमा आयोजित कार्यक्रममा जिल्ला–नगर उपाध्यक्ष गुप्ताले जग्गाधनी प्रमाणपुर्जा महासंघ बागमती प्रदेशका अध्यक्ष श्रेष्ठलाई हस्तान्तरण गरेका थिए ।
कार्यक्रममा महासंघ बागमती प्रदेशका कोषाध्यक्ष रुद्रबहादुर खत्री, कार्यकारी निर्देशक विवेक मानन्धर तथा कार्यालय सहायक रश्मि खनाललगायतको सहभागिता रहेको थियो।
