काठमाडौं । जनता समाजवादी पार्टी (जसपा) नेपाल त्यागेका नेता रामकुमार शर्माले पुराना राजनीतिक दल र परीक्षण भइसकेका नेताहरूको नेतृत्वमा अब मधेस केन्द्रित राजनीति अघि बढ्न नसक्ने बताउनुभएको छ ।
शुक्रबार काठमाडौंमा ‘हुंकार मधेस’ अभियान घोषणा कार्यक्रममा अभियानको अवधारणा प्रस्तुत गर्दै शर्माले मधेसवादी दलहरू विचार र सिद्धान्तको राजनीतिभन्दा व्यक्तिवादी राजनीतिमा केन्द्रित भएको आरोप लगाउनुभयो । नेताहरूको केन्द्रीकृत सोच र अहंकारका कारण मधेस प्रदेशले अपेक्षाअनुसार विकास गर्न नसकेको उहाँको भनाइ थियो ।
शर्माले मधेस, थरुहट तथा उत्पीडित समुदायको राजनीतिलाई नयाँ पुस्ताको नेतृत्वमा अघि बढाउनुपर्नेमा जोड दिनुभयो । गत वर्षको जेन–जी आन्दोलनपछि संघीय लोकतान्त्रिक मोर्चामा आबद्ध मधेसी शक्तिहरूबीच एकताका लागि पटक–पटक प्रयास भए पनि केही नेतृत्वको हठ, अहंकार र पदप्रतिको आसक्तिका कारण एकीकरण हुन नसकेको उहाँले बताउनुभयो ।
उहाँले त्यसको परिणामस्वरूप गत फागुनमा सम्पन्न निर्वाचनमा मधेस केन्द्रित दलहरू कमजोर अवस्थामा पुगेको दाबी गर्नुभयो । निर्वाचनपछि पनि एकीकरण र युवा पुस्तामा नेतृत्व हस्तान्तरणका प्रयास भए पनि केही नेताहरूले जनभावना र समयको मागलाई आत्मसात् नगर्दा पुनः एकीकरणको प्रयास असफल भएको उहाँको भनाइ थियो ।
शर्माले अब कुनै एउटा पुरानो पार्टी वा पुराना नेताको नेतृत्वमा मधेस, थरुहट र उत्पीडित समुदायको राजनीति अघि बढाउन सम्भव नरहेको बताउनुभयो । पुराना नेताहरूले विगतमा गरेका सकारात्मक कामको सम्मान गर्दै उनीहरूलाई मार्गदर्शक, सल्लाहकार र अभिभावकको भूमिकामा राखेर नयाँ पुस्ताको नेतृत्वमा साझा राजनीतिक शक्ति निर्माण गर्नुपर्ने उहाँले बताउनुभयो ।
सक्षम, इमानदार र योग्य युवाको नेतृत्वमा सामूहिक नेतृत्व प्रणालीको अभ्यास गर्दै समयसापेक्ष मुद्दा, एजेन्डा, सिद्धान्त र मौलिक विचारका आधारमा अघि बढ्नुपर्ने शर्माको भनाइ थियो । साथै, नेपालको भूराजनीतिक अवस्थालाई सन्तुलित राख्दै मधेसको राजनीतिलाई नयाँ ढंगबाट अघि बढाउनुपर्ने उहाँले बताउनुभयो ।
शर्माले मधेसको राजनीतिलाई एकताबद्ध गर्दै पुनर्जागरण गर्ने उद्देश्यले ‘हुंकार मधेस’ अभियान सञ्चालन गरिएको जानकारी दिनुभयो ।
