काठमाडाैँ । राष्ट्रिय स्वतन्त्र पार्टीकी सचेतक क्रान्तिशिखा धितालले प्रधानमन्त्री बालेन्द्र शाहले संयुक्त राष्ट्रसंघको ८१औँ महासभामा गरेको सम्बोधनले नेपालको आवाज विश्वमञ्चमा पुर्याएको बताएकी छन्।
सामाजिक सञ्जालमार्फत प्रतिक्रिया दिँदै धितालले प्रधानमन्त्री शाहले जलवायु परिवर्तन र त्यसबाट नेपालले भोगिरहेको मानवीय तथा विकाससम्बन्धी संकटलाई अन्तर्राष्ट्रिय समुदायसामु प्रस्तुत गरेको उल्लेख गरेकी छन्।
उनले प्रधानमन्त्रीले ‘क्लाइमेट चेन्ज डज नट रिकग्नाइज बोर्डर्स’ भन्दै जलवायु परिवर्तनले सीमा नचिन्ने र हिमनदी तथा बाढीले राहदानीमा छाप लगाएर यात्रा नगर्ने विषयलाई जोड दिएको बताएकी छन्। त्यस्तै, नेपाललाई मानवीय सहयोग गर्ने राष्ट्रिय तथा अन्तर्राष्ट्रिय समुदायप्रति प्रधानमन्त्रीले कृतज्ञता व्यक्त गरेको धितालले उल्लेख गरेकी छन्।
धितालले युद्धका लागि त्रुटिरहित रसद प्रणाली भए पनि खाद्यान्नका लागि कमजोर रसद प्रणाली रहेको विश्व व्यवस्थामाथि प्रधानमन्त्रीले प्रश्न उठाएको बताएकी छन्। उनका अनुसार नेपालले आफूले नतताएको जलवायु परिवर्तन र आफूले सुरु नगरेको युद्धको असरसमेत भोगिरहेको विषय प्रधानमन्त्रीको सम्बोधनमा उठाइएको थियो।
‘नेपालका लागि जलवायु विपद् मानवीय संकट मात्रै होइन, विकासको आपत्काल पनि हो’ भन्ने धारणा विश्वमञ्चमा साझा गर्नु महत्वपूर्ण सुरुआत भएको धितालले बताएकी छन्।
उनले यो पहललाई गन्तव्यसम्म पुर्याउन निरन्तर बैठक, छलफल र समन्वय आवश्यक रहेको बताउँदै नेपालको आवाजलाई विश्वमञ्चमा निरन्तर उठाइरहनुपर्नेमा जोड दिएकी छन्।
प्रधानमन्त्री शाह, परराष्ट्रमन्त्री तथा नेपाली प्रतिनिधिमण्डलप्रति आभार व्यक्त गर्दै धितालले नेपालको जलवायु संकटलाई अन्तर्राष्ट्रिय तहमा उठाउन नेतृत्व गरेकोमा धन्यवाद दिएकी छन्।
