काठमाडाैँ । जनकपुरधाममा गुठी तथा कुटीको जग्गामा लामो समयदेखि बसोबास गर्दै आएका परिवारले आफूहरूलाई विस्थापित गर्न खोजिएको भन्दै शुक्रबार विरोध प्रदर्शन गर्ने भएका छन्।
‘गुठी कुटी घर जग्गा व्यवस्थापन महासंघर्ष समिति’को आयोजनामा हुने प्रदर्शनमार्फत सरकारको पछिल्लो कदमको विरोध गर्दै आफ्नो हकअधिकार सुनिश्चित गर्न माग गरिने भएको हो।
समितिका अध्यक्ष सन्तोष साहका अनुसार जनकपुरधाम उपमहानगरपालिकाका २५ वटै वडामा गुठी तथा कुटीको जग्गामा बसोबास गर्दै आएका सयौँ परिवार सरकारी नीतिका कारण विस्थापित हुने त्रासमा छन्। पुस्तौँदेखि कुटीको जग्गामा बसोबास गर्दै आएका परिवारलाई पछिल्लो समय प्रशासनले प्रक्रियागत झन्झट देखाउँदै उठिवास गराउन खोजेको उहाँको आरोप छ।
आन्दोलनका क्रममा शुक्रबार जनकपुरधाम नगर क्षेत्रमा प्रदर्शन गरिनेछ। प्रदर्शनपछि नगर परिक्रमा गर्दै जिल्ला प्रशासन कार्यालय धनुषामा पुगेर मुख्यमन्त्री र प्रधानमन्त्रीलाई सम्बोधन गरिएको ज्ञापनपत्र बुझाउने तयारी समितिले गरेको छ।
समितिले कुटीको जग्गामा बसोबास गर्दै आएका परिवारलाई जग्गाको रैतान नम्बरी कायम गरी स्वामित्वको अधिकार दिनुपर्ने माग गरेको छ। साथै, तत्कालका लागि जग्गा खाली गराउने वा उठिवास गराउने कार्य रोक्दै प्रभावित परिवारको उचित बासस्थानको ग्यारेन्टी गर्नुपर्ने माग पनि अघि सारेको छ।
अध्यक्ष साहले आफूहरू गुठीको नभई कुटीको जग्गामा बसोबास गर्दै आएको दाबी गर्दै राज्यले कानुनको अपव्याख्या गरेर आफूहरूका सन्तानको भविष्यमाथि खेलवाड गर्न नहुने बताउनुभयो।
संघर्ष समितिले आफ्ना माग सम्बोधन नभएसम्म आन्दोलनका कार्यक्रमलाई निरन्तरता दिने चेतावनी दिएको छ।
