काठमाडौं । नेकपा (एमाले)का उपमहासचिव योगेश भट्टराईले पार्टीको केन्द्रीय कमिटी बैठकले अध्यक्ष केपी शर्मा ओलीलाई सम्मानजनक रूपमा नेतृत्वबाट बिदाइ गर्नुपर्ने प्रस्ताव अस्वीकार गरेको बताउनुभएको छ ।
बिहीबार ललितपुरमा सञ्चारकर्मीसँग कुरा गर्दै भट्टराईले नेतृत्व पुनर्गठनको विषय एउटा बैठक वा छलफलबाट मात्रै टुंगिन नसक्ने बताउनुभयो । उहाँले आगामी बैठक तथा विभिन्न कमिटीमा समेत यस विषयमा छलफल गर्दै जाने बताउनुभयो ।
भट्टराईका अनुसार एमालेको अबको मुख्य कार्यभार स्थानीय तह निर्वाचनको तयारी गर्नु हो । उहाँले पार्टी एकताबद्ध भएर निर्वाचनमा केन्द्रित हुने बताउनुभयो ।
स्थानीय तह निर्वाचनका लागि उम्मेदवार छनोटदेखि अन्य तयारीमा तल्लो तहका कमिटीलाई अधिकारसम्पन्न बनाउने उहाँले बताउनुभयो । कार्यकर्ता र जनताको भावनाअनुसार उम्मेदवार छनोट गरिने तथा जनअपेक्षाअनुसारको घोषणापत्रसहित निर्वाचनमा जाने तयारी रहेको उहाँको भनाइ छ ।
उहाँले एमालेका विचार, सिद्धान्त र संगठनलाई आधार बनाएर स्थानीय तह निर्वाचनको व्यापक तयारीमा पार्टी अघि बढ्ने बताउनुभयो ।
