काठमाडाैँ । राष्ट्रिय सभा सदस्य खम्बबहादुर खातीले वर्तमान सरकारको कार्यशैली र सुशासनको नाराप्रति असन्तुष्टि जनाउनुभएको छ ।
बिहीबार बसेको राष्ट्रिय सभाको बैठकमा बोल्दै नेपाली कांग्रेसका सांसद खातीले भोटेकोशी बाढीपीडितको उद्धार तथा पुनःस्थापनाका लागि गठित संसदीय विशेष समितिमा राष्ट्रिय सभालाई उपेक्षा गरिएको भन्दै आपत्ति जनाउनुभयो ।
सरकार परिवर्तनलाई सामान्य राजनीतिक प्रक्रियाका रूपमा लिन सकिने भए पनि त्यसबाट जनताको दैनिक जीवनमा देखिनुपर्ने सकारात्मक परिवर्तन हुन नसकेको उहाँले बताउनुभयो । सुशासन अहिलेको राजनीतिमा सबैभन्दा बढी प्रयोग हुने शब्द बने पनि व्यवहारमा त्यसको अनुभूति जनताले गर्न नपाएको उहाँको भनाइ थियो ।
नागरिक सरकारी कार्यालयमा सेवा लिन जाँदा अझै पनि पहुँच र चिनजान खोज्नुपर्ने अवस्था रहेको उल्लेख गर्दै सांसद खातीले सुशासन भाषणमा मात्र सीमित भएको आरोप लगाउनुभयो ।
उहाँले भन्नुभयो, ‘सरकार फेरिन्छ, मन्त्री फेरिन्छन्, नारा फेरिन्छन् तर समस्या उही रहन्छ । जनताले पटक–पटक प्रश्न गरिरहेका छन्, के सरकार फेरिएको हो कि केवल कुर्सीमा बस्ने मानिस मात्र फेरिएका हुन् ? विपक्षमा हुँदा भ्रष्टाचारको विरोध गर्ने, सत्तामा पुगेपछि समिति र आयोग बनाउने, अनि प्रतिवेदन सार्वजनिक गर्न डराउने प्रवृत्तिले लोकतन्त्रमाथि प्रश्न उठाएको छ ।’
राज्यका संस्थालाई बलियो नबनाई गरिने घोषणा र प्रतिबद्धताले ठोस परिणाम दिन नसक्ने उहाँले बताउनुभयो । सामाजिक सञ्जाल र सूचना प्रविधिले राजनीतिमा ठूलो परिवर्तन ल्याए पनि राज्यका संयन्त्रहरू सत्यतथ्य सूचना प्रवाह गर्न असफल भइरहेको उहाँको भनाइ थियो ।
