ललितपुर । ललितपुरको सानेपास्थित रेडियन्ट बहुउद्देश्यीय सहकारी संस्था लिमिटेडको मुख्य आयोजनामा भएको निःशुल्क बृहत् स्वास्थ्य शिविरमा १ हजार १ सय २७ जनाले स्वास्थ्य सेवा लिएका छन् ।
रेडियन्ट रिडर्स एकेडेमीको प्राङ्गणमा आयोजित शिविर काठमाडौं मेडिकल कलेजको विशेष प्राविधिक सहयोगमा सम्पन्न भएको हो । बिहान ९ बजेदेखि दिउँसो ४ बजेसम्म सञ्चालन भएको शिविरमा काठमाडौं मेडिकल कलेजका विशेषज्ञ चिकित्सकसहित २९ जनाको टोलीले स्वास्थ्य परीक्षण तथा उपचार सेवा दिएको थियो ।
शिविरमा जनरल मेडिसिन, स्त्री रोग, जनरल सर्जरी, हाडजोर्नी तथा नशा रोग, नाक, कान तथा घाँटी, बालरोग, आँखा र दन्त रोगको निःशुल्क परीक्षण तथा उपचार गरिएको थियो ।
जनरल मेडिसिनतर्फ १६९, स्त्री रोगतर्फ ६६, जनरल सर्जरीतर्फ ४१, हाडजोर्नी तथा नशा रोगतर्फ ८३, नाक, कान तथा घाँटीतर्फ १०१, बालरोगतर्फ ५२, आँखातर्फ १९६ र दन्त रोगतर्फ ९६ जनाले सेवा लिएका थिए । त्यस्तै, ६ जनाको दाँत निकालिएको थियो ।
शिविरमा ८४ जनाको ईसीजी, १०२ जनाको भिडियो एक्सरे तथा १३९ जनाको विभिन्न प्रयोगशाला परीक्षण गरिएको थियो । प्रयोगशालामा एचबी, सुगर, युरिया, युरिक एसिड, रक्त समूह, पिसाब परीक्षण तथा गर्भ परीक्षणलगायतका सेवा प्रदान गरिएको थियो । थप उपचार आवश्यक देखिएका १९ जनालाई काठमाडौं मेडिकल कलेजमा उपचारका लागि सिफारिस गरिएको आयोजकले जनाएको छ ।
काठमाडौं मेडिकल कलेजका शिविर संयोजक मदन श्रेष्ठले शिविर व्यवस्थित र योजनाबद्ध रूपमा सम्पन्न भएको बताउनुभयो । उहाँले रेडियन्ट बहुउद्देश्यीय सहकारी संस्था, शेयर सदस्य, स्थानीयवासी तथा शिविरमा सहभागी सबैलाई धन्यवाद दिनुभयो ।
सहकारी संस्थाका व्यवस्थापक खगेन्द्र ढुंगानाले संस्थाको सामाजिक उत्तरदायित्वअन्तर्गत शिविर आयोजना गरिएको बताउनुभयो । उहाँले शेयर सदस्य तथा स्थानीयवासीलाई स्वास्थ्य सेवा उपलब्ध गराउने उद्देश्यले आयोजना गरिएको शिविरमा करिब १२ सय जनाले सेवा लिएको जानकारी दिनुभयो ।
शिविरमा सहभागी भई थप उपचार आवश्यक पर्ने बिरामीका लागि काठमाडौं मेडिकल कलेज दुवाकोटमा असोज महिनाभर ५० प्रतिशत र त्यसपछि २५ प्रतिशत छुटको व्यवस्था गरिएको ढुंगानाले जानकारी दिनुभयो । आगामी दिनमा सहकारी र अस्पतालबीच समझदारीपत्र गर्ने तयारी भइरहेको उहाँले बताउनुभयो ।
शिविरमा रेडियन्ट रिडर्स एकेडेमीका शिक्षक–शिक्षिका, लायन्स क्लब अफ काठमाडौं निर्वाना तथा लियोका सदस्य स्वयंसेवकका रूपमा खटिएका थिए । ग्लोबल कन्सल्ट प्रालि र लायन्स क्लब अफ काठमाडौं क्यापिटल सिटीले सहआयोजकका रूपमा सहयोग गरेका थिए।
