काठमाडौं । सरकारले भोटेकोशी बाढीमा ज्यान गुमाएकाहरूको सम्मानमा यही भदौ २२ गते राष्ट्रिय शोक मनाउने भएको छ ।
बिहीबार बसेको मन्त्रिपरिषद् बैठकले भोटेकोशी बाढी गएको १३औँ दिन अर्थात् भदौ २२ गते सोमबार राष्ट्रिय शोक घोषणा गर्ने निर्णय गरेको हो ।
सरकारका प्रवक्ता एवं शिक्षा तथा खेलकुदमन्त्री सस्मित पोखरेलका अनुसार राष्ट्रिय शोकका दिन देशभरका सरकारी कार्यालयमा राष्ट्रिय झण्डा आधा झुकाइनेछ ।
भदौ १० गते रसुवाको भोटेकोशी नदीमा आएको विनाशकारी बाढीका कारण ठूलो मानवीय तथा भौतिक क्षति भएको छ । सरकारले बाढीमा परी ज्यान गुमाउनेहरूप्रति श्रद्धाञ्जली तथा शोकसन्तप्त परिवारप्रति समवेदना व्यक्त गर्दै राष्ट्रिय शोक मनाउने निर्णय गरेको हो ।
