काठमाडौं । सत्तारुढ दल राष्ट्रिय स्वतन्त्र पार्टी (रास्वपा) का सांसद मनिष झाले जलवायु परिवर्तनका कारण नेपालले व्यहोर्नुपरेको क्षतिको क्षतिपूर्ति कार्बन उत्सर्जनमा ठूलो योगदान रहेका देशहरूले दिनुपर्ने बताउनुभएको छ ।
प्रतिनिधि सभाको बिहीवारको बैठकमा बोल्दै सांसद झाले नेपालले कार्बन उत्सर्जनमा नगण्य योगदान गरे पनि बाढी, पहिरो लगायत जलवायुजन्य विपद्को ठूलो क्षति व्यहोर्नुपरेको भन्दै अन्तर्राष्ट्रिय समुदायको ध्यानाकर्षण गराउनुभएको हो ।
उहाँले अब नेपालले राहत माग्नेभन्दा पनि जलवायु न्याय र क्षतिपूर्तिको माग गर्नुपर्ने समय आएको बताउनुभयो । नेपालले समस्या सिर्जना नगरेको अवस्थामा त्यसको मूल्य नेपालले नै किन चुकाउनुपर्ने भन्ने प्रश्नसमेत उहाँले उठाउनुभयो ।
सांसद झाले नेपालले जलवायु संरक्षणका लागि वन क्षेत्र विस्तार, विद्युतीय सवारी साधनको प्रयोग तथा जलविद्युत् विकासलाई प्राथमिकता दिएको उल्लेख गर्नुभयो । उहाँका अनुसार नेपालले कार्बन उत्सर्जन नबढाए पनि जलवायु परिवर्तनको प्रत्यक्ष असर भने भोगिरहेको छ ।
उहाँले नेपालको कार्बन उत्सर्जन १ प्रतिशतभन्दा कम रहेको उल्लेख गर्दै चीन, भारत र अमेरिकाजस्ता मुलुकको उत्सर्जनको हिस्सा तुलनात्मक रूपमा निकै ठूलो रहेको बताउनुभयो ।
‘यदि हामीले यो समस्या निम्त्याएका होइनौं भने यसको मूल्य हामी किन चुकाउँदै छौं ? हामी किन यसको भार बोक्दै छौं ?’ भन्दै उहाँले प्रश्न गर्नुभयो ।
सांसद झाले जलवायु परिवर्तनका कारण नेपालमा भइरहेको क्षतिलाई अन्तर्राष्ट्रिय मञ्चमा सशक्त रूपमा उठाउन सबै राजनीतिक दल एकजुट हुनुपर्नेमा जोड दिनुभयो । उहाँले नेपालले राहतको याचना नभई कार्बन उत्सर्जनका लागि जिम्मेवार देशबाट क्षतिपूर्ति माग गर्नुपर्ने बताउनुभयो ।
प्रधानमन्त्री बालेन्द्र साहलाई संयुक्त राष्ट्रसंघ लगायतका अन्तर्राष्ट्रिय फोरममा नेपालको जलवायु न्याय र क्षतिपूर्तिको विषयलाई प्राथमिकताका साथ उठाउन पनि उहाँले आग्रह गर्नुभयो ।
