काठमाडौँ । सत्तारुढ दल राष्ट्रिय स्वतन्त्र पार्टी (रास्वपा)ले रसुवा बाढीपछिको खोज, उद्धार तथा राहत कार्य सरकारको नेतृत्वमा सन्तोषजनक रूपमा अघि बढिरहेको निष्कर्ष निकालेको छ ।
बिहीवार बसेको पार्टीको सचिवालय बैठकले सरकारबाट भइरहेका कामको समीक्षा गर्दै यस्तो निष्कर्ष निकालेको हो । बैठकपछि प्रवक्ता जगदीश खरेलले सरकारको नेतृत्वमा भइरहेका खोज, उद्धार तथा राहतका काम सन्तोषजनक रहेको जानकारी दिनुभयो ।
बैठकमा सरकारमा रास्वपाको प्रतिनिधित्व गर्दै अर्थमन्त्रीसमेत रहनुभएका उपमहासचिव डा. स्वर्णिम वाग्लेले हालसम्म भएका प्रगति तथा सरकारले गरिरहेका कामबारे विस्तृत जानकारी गराउनुभएको थियो ।
प्रवक्ता खरेलका अनुसार सरकारले हालसम्म ८ अर्ब रुपैयाँभन्दा बढी सहयोग संकलन गरिसकेको छ । संकलित रकममध्ये १ अर्ब रुपैयाँभन्दा बढी विपद् व्यवस्थापन प्राधिकरणलाई र ६ करोड रुपैयाँभन्दा बढी स्थानीय तहलाई उपलब्ध गराइसकिएको बैठकमा जानकारी दिइएको छ ।
बैठकमा सचिवालय सदस्यहरूले सरकारले हालसम्म गरेका कामको प्रशंसा गर्दै खोज, उद्धार तथा राहतका कामलाई अझ प्रभावकारी र तीव्र गतिमा अघि बढाउनुपर्नेमा जोड दिएका छन् ।
प्रवक्ता खरेलले सरकारका तर्फबाट हालसम्म भएका काम सन्तोषजनक भए पनि आगामी दिनमा त्यसलाई अझ प्रभावकारी बनाउनुपर्ने आवश्यकता रहेको बताउनुभयो ।
रास्वपाले राहत वितरण प्रक्रियालाई थप व्यवस्थित बनाउन तथा बाढी प्रभावित क्षेत्रमा सरकारी उपस्थिति अझ सशक्त बनाउन सरकारलाई आग्रह गरेको छ ।
