काठमाडाैँ । नेपाल भाषाका प्रतिष्ठित साहित्यकार एवं जनकवि दुर्गालाल श्रेष्ठको मंगलवार अन्तिम संस्कार गरिएको छ ।
९३ वर्षको उमेरमा बुढानीलकण्ठस्थित निजी निवासमा निधन भएका श्रेष्ठको काठमाडौंको शोभा भगवती घाटमा अन्त्येष्टि गरिएको हो । विगत ६ दशकदेखि साहित्य सिर्जनामा अनवरत रूपमा सक्रिय श्रेष्ठले नेपाल भाषा र नेपाली भाषा दुवैमा कविता, गीत तथा साहित्यका विभिन्न विधामा कलम चलाउनुभएको थियो । विशेष गरी नेपाल भाषाको साहित्यमा उहाँको अतुलनीय योगदान रहेको छ, जहाँ उहाँका एक दर्जनभन्दा बढी कृतिहरू प्रकाशित छन् ।
साहित्य क्षेत्रमा पु¥याएको विशिष्ट योगदानको कदर गर्दै उहाँलाई दुई दशकअघि नेपाल भाषा परिषद्ले ‘जनकवि’को उपाधि प्रदान गरेको थियो । त्यसैगरी, उहाँलाई सन् २०१० (वि.सं. २०६७) मा प्रतिष्ठित ‘जगदम्बा श्री पुरस्कार’ बाट समेत सम्मानित गरिएको थियो ।
श्रेष्ठको अन्तिम बिदाइका क्रममा निकालिएको शवयात्रामा राजनीतिक दलका नेता, मन्त्रीगण तथा विभिन्न क्षेत्रका व्यक्तित्वहरूको उपस्थिति रहेको थियो । श्रद्धाञ्जली अर्पण गर्न नेपाली काँग्रेसका सभापति गगनकुमार थापा, गृहमन्त्री सुदन गुरुङ, ऊर्जा, जलस्रोत तथा सिंचाईमन्त्री विराजभक्त श्रेष्ठ, काठमाडौं महानगरपालिकाकी कार्यवाहक प्रमुख सुनिता डंगोल लगायतका उच्च पदस्थ व्यक्तिहरू शोभा भगवती पुगेका थिए ।
