काठमाडौं । नेपाल अटोमोबाइल इम्पोर्टर्स एण्ड म्यानुफ्याक्चरर्स एशोसिएशन (नाइमा) की अध्यक्ष ऋतुसिंह वैद्यले यस वर्षको नाडा अटो शो विगतको तुलनामा अत्यन्तै सफल र उत्साहजनक भएको बताउनुभएको छ ।
मेलाको अन्तिम दिन आइतबार आयोजित पत्रकार भेटघाटमा अध्यक्ष वैद्यले दर्शकको चापसँगै व्यावसायिक सहभागितासमेत उल्लेख्य रूपमा बढेको जानकारी दिनुभयो । उहाँका अनुसार आइतबार दिउँसो ३ बजेसम्म १ लाख ६५ हजारभन्दा बढी दर्शकले मेला अवलोकन गरिसकेका छन् । मेलाको अन्त्यसम्म दर्शक संख्या १ लाख ७० हजारदेखि १ लाख ७५ हजारसम्म पुग्ने नाइमाको अनुमान छ ।
गत संस्करणमा करिब १ लाख दर्शकले मेला अवलोकन गरेका थिए । यस वर्ष भने ५५ वटा विभिन्न ब्रान्डका सवारीसाधन तथा अन्य अटोमोबाइल उत्पादन प्रदर्शनीमा राखिएका थिए । गत वर्ष ४२ वटा ब्रान्ड सहभागी रहेकामा यसपटक प्रदर्शकको संख्या उल्लेख्य रूपमा बढेको हो ।
अध्यक्ष वैद्यले गाडी बुकिङको अवस्था अपेक्षाभन्दा निकै राम्रो रहेको बताउनुभयो । यद्यपि विभिन्न स्टलमा भएका बुकिङको आधिकारिक तथ्यांक संकलन हुन बाँकी रहेकाले तत्काल बिक्रीको यकिन विवरण सार्वजनिक गर्न कठिन रहेको उहाँको भनाइ छ ।
“हालसम्म १ लाख ६५ हजारभन्दा बढी दर्शकले मेला अवलोकन गर्नुभएको छ । हाम्रो प्रक्षेपणअनुसार यो संख्या १ लाख ७० देखि ७५ हजारको बीचमा पुग्ने देखिन्छ । गाडी बुकिङको अवस्था अपेक्षाभन्दा निकै राम्रो छ,” अध्यक्ष वैद्यले भन्नुभयो ।
उहाँले मेलाले आगामी एकदेखि डेढ महिनासम्म आयातकर्ता तथा विभिन्न ब्रान्डको व्यवसाय विस्तारमा समेत सकारात्मक आधार तयार गर्ने बताउनुभयो ।
प्रदर्शनी स्थलको अभावका कारण यसपटक सबै व्यावसायिक सवारीसाधनका ब्रान्डलाई समेट्न नसकिएको नाइमाले जनाएको छ । आगामी दिनमा व्यावसायिक सवारीसाधनका लागि छुट्टै ‘एक्स्पो’ आयोजना गर्ने विषयमा अध्ययन तथा सर्वेक्षण गरी योजना बनाइने अध्यक्ष वैद्यले जानकारी दिनुभयो ।
मेलालाई व्यवस्थित बनाउन बैंकिङ, बीमा, फुड स्टल तथा सुरक्षालगायतका आवश्यक व्यवस्थापन गरिएको नाइमाले जनाएको छ । अत्यधिक दर्शकका कारण पार्किङ व्यवस्थापनमा केही चुनौती देखिए पनि समग्र व्यवस्थापन प्रभावकारी रहेको अध्यक्ष वैद्यको दाबी छ ।
३–एस (सेल्स, स्पेयर्स पार्ट्स र सर्भिस) को अवधारणाअनुसार विभिन्न वितरकको उपस्थिति र प्रतिनिधित्वले ग्राहकलाई आवश्यक जानकारी तथा सेवा प्राप्त गर्न सहज भएको नाइमाले जनाएको छ ।
