काठमाडौँ। नेपाल वायुसेवा निगम (नेपाल एयरलाइन्स) ले गत आर्थिक वर्षमा यात्रु, कार्गो तथा आम्दानीमा उल्लेख्य वृद्धि गरेको छ ।
निगमका प्रवक्ता अर्चना खड्काका अनुसार आर्थिक वर्ष २०८१/८२ को तुलनामा गत आव २०८२/८३ मा नेपाल एयरलाइन्सको उडान सङ्ख्या, यात्रु सङ्ख्या, कार्गो ढुवानी र राजस्व सबै क्षेत्रमा वृद्धि भएको हो ।
उहाँले आव २०८२/८३ मा ११ प्रतिशतले वृद्धि गर्दै निगमले कूल तीन हजार ५९४ उडान सञ्चालन गरेको छ । आव २०८१/८२ को तीन हजार १८९ उडान सञ्चालन गरेको थियो । उक्त अवधिमा नेपाल एयरलायन्सबाट यात्रा गर्ने यात्रुको सङ्ख्या छ लाख १३ हजार ७८४ पुगेको छ । अघिल्लो आवमा पाँच लाख ५० हजार २०७ थियो । यो १० प्रतिशतले बढी हो ।
सबैभन्दा बढी कार्गो ढुवानीमा वृद्धि देखिएको छ । आव २०८२/८३ मा निगमले ४७ लाख ४७ हजार ५४५ किलो कार्गो ढुवानी गरेको छ भने अघिल्लो आवमा ३४ लाख २७ हजार ५७७ किलो ढुवानी गरेको थियो । यो २८ प्रतिशतले बढी हो ।
निगमको राजस्व पनि वृद्धि भएको छ । अघिल्लो आवमा रु १५ अर्ब ३१ करोड ७९ लाख २२ हजार ४३७ राजस्व सङ्कलन गरेको निगमले गत आव २०८२/८३ मा निगमले रु १७ अर्ब ५२ करोड ५३ लाख ४३ हजार १२० आम्दानी गरेको छ ।
यद्यपि, अकुपेन्सीमा भने गिरावट देखिएको छ । आव २०८१/८२ मा ८३ प्रतिशत अकुपेन्सी रहेकामा आव २०८२/८३ मा ८० प्रतिशतमा सीमित भएको थियो । गत असारमा पनि निगमको आम्दानी र नेपाल एयरलाइन्सको अकुपेन्सी दुवै बढेको जनाइएको छ । निगमका प्रवक्ता खड्काका अनुसार गत वर्षको असारको तुलनामा यस वर्षको असारमा आम्दानी ३२ प्रतिशतले बढेको छ भने अकुपेन्सी ७५ प्रतिशतबाट बढेर ८५ दशमलव चार प्रतिशत पुगेको छ ।
निगममा सुशासन र संस्थागत सुधारको प्रयास
नयाँ नेतृत्व आएपछि नेपाल वायुसेवा निगममा सुशासन तथा संस्थागत सुधार अभियान सुरु गरिएको बताउँदै यसले सकारात्मक परिणाम दिन थालेको पनि निगमले जनाएको छ ।
निगमका अनुसार खुला प्रतिस्पर्धाबाट सञ्चालक समिति गठन र कार्यकारी अध्यक्ष शैलेशकुमार श्रेष्ठ नियुक्तिपछि व्यवस्थापकीय सुधार, कार्यसम्पादनमा जवाफदेहिता तथा सेवा व्यवस्थापनमा सुधारका काम अघि बढाइएको छ ।
तीन वर्षभित्र निगमलाई आत्मनिर्भर बनाउने लक्ष्यसहित संस्थागत सुधार, स्रोतसाधनको प्रभावकारी परिचालन, खर्च नियन्त्रण, सेवा विस्तार र सञ्चालन दक्षता अभिवृद्धिका कार्यक्रम कार्यान्वयनमा ल्याइएको निगमले जनाएको छ ।
निगमले आगामी दिनमा नयाँ रुट विस्तार, वित्तीय अनुशासन सुदृढीकरण तथा नेपाल वायुसेवा निगमलाई आत्मनिर्भर, प्रतिस्पर्धी, पारदर्शी र विश्वासनीय राष्ट्रिय ध्वजावाहकका रूपमा स्थापित गर्ने प्रतिबद्धता व्यक्त गरेको छ ।
