पर्सा । सशस्त्र प्रहरी बल, नेपाल नं १३ गण मुख्यालय पर्साले भन्सार छली गरी ओसारपसार हुँदै गरेका रु २३ लाख ५८ हजार ९० बराबरका अवैध सामान बरामद गरेको छ ।
मुख्यालयले जिल्लाका विभिन्न सीमा क्षेत्रमा सञ्चालन गरेको विशेष जाँच तथा गोप्य सूचनाका आधारमा गरिएको कारबाहीमा भन्सार छली गरी ओसारपसार हुँदै गरेका अवैध सामान बरामद गरिएको सशस्त्र प्रहरी बल नं १३ गण मुख्यालयका सूचना अधिकारी एवं सशस्त्र प्रहरी नायब उपरीक्षक मोहनराज निरौलाले जानकारी दिनुभयो ।
आज सीमा सुरक्षा गुल्म हेडक्वाटर (वीरगञ्ज), सीमा सुरक्षा पोष्ट (सिर्सिया) तथा सीमा सुरक्षा गुल्म हेडक्वाटर (भिखमपुर)बाट खटिएको टोलीले जिल्लाका विभिन्न सीमा क्षेत्रमा चेकजाँच सञ्चालन गरेको हो । सोही क्रममा अवैध सामान ओसारपसार हुँदै गरेका कपडा, फलफूल, हार्डवेयर, कम्प्युटर पाट्र्स, मोटरसाइकलका पाट्र्स, किराना सामान, कस्मेटिक सामग्री, मदिरालगायत म्याजिक भ्यान, टाँगा तथा घोडासहित सो रकम बराबरका विभिन्न सामान तथा प्रयोग भएका सवारीसाधन बरामद गरिएको उहाँले बताउनुभयो ।
उक्त जाँच वीरगञ्ज महानगरपालिका–१४ गण्डकचोक, वडा नं १६ इनर्वा र भगवा तथा वडा नं १ छप्कैयालगायत सीमा क्षेत्रमा गरिएको हो । बरामद गरिएका सम्पूर्ण सामान तथा प्रयोग भएका सवारीसाधन आवश्यक कारबाहीका लागि वीरगञ्ज भन्सार कार्यालय, पर्सामा बुझाइएको सशस्त्र प्रहरी बल नं १३ गण मुख्यालयले जनाएको छ । रासस
