काठमाडौं । राष्ट्रपति रामचन्द्र पौडेलले सुनसरीको देवानगञ्ज गाउँपालिका–कप्तानगञ्जलगायत तराई–मधेशका विभिन्न जिल्लामा विकसित विषम परिस्थितिबारे प्रथम राष्ट्रपति डा. रामबरण यादव र प्रथम उपराष्ट्रपति परमानन्द झासँग छलफल गर्नुभएको छ।
शुक्रबार राष्ट्रपति भवन शीतल निवासमा भएको छलफलमा राष्ट्रपति पौडेलले पछिल्ला घटनाप्रति गहिरो चिन्ता व्यक्त गर्दै सदियौँदेखि कायम रहँदै आएको सामाजिक, धार्मिक तथा जातीय सद्भाव, सहिष्णुता र राष्ट्रिय एकतालाई जोगाउन सबै पक्षले जिम्मेवारीपूर्वक पहल गर्नुपर्नेमा जोड दिनुभएको राष्ट्रपतिका प्रेस सल्लाहकार किरण पोखरेलले जानकारी दिनुभयो।
छलफलका क्रममा प्रथम राष्ट्रपति डा. रामबरण यादवले वर्तमान विषम परिस्थितिमा सरकारले सबै राजनीतिक दल, नागरिक समाज, धार्मिक अगुवा तथा आम नागरिकलाई साथमा लिएर समस्या समाधानतर्फ प्रभावकारी पहल गर्न सक्नुपर्ने धारणा व्यक्त गर्नुभएको थियो।
छलफलमा मुलुकमा सामाजिक सद्भाव कायम राख्दै संवाद र सहकार्यका माध्यमबाट उत्पन्न समस्या समाधान गर्नुपर्ने विषयमा पनि जोड दिइएको जनाइएको छ।
