काठमाडौं। नेपाल टेलिकमका तत्कालीन प्रबन्ध निर्देशक सुनिल पौडेललाई भ्रष्टाचार मुद्दामा विशेष अदालतले साढे ८ वर्ष कैद र रु. १ करोड ५४ लाख २५ हजार २०० जरिबाना हुने फैसला गरेको छ।
न्यायाधीश सुदर्शनदेव भट्ट, हेमन्त रावल र डिल्लीरत्न श्रेष्ठको इजलासले बिहीबार फैसला सुनाउँदै पौडेलसँगै दीपक आनन्दलाई पनि समान रकम जरिबाना र ८ वर्ष कैद सजाय तोकेको हो। पौडेलले कसुर गरेको समयमा राष्ट्रिय सूचना प्रविधि केन्द्र (एनआईटीसी) को कार्यकारी निर्देशकको जिम्मेवारीमा समेत रहेकाले उनलाई थप ६ महिना कैद सजाय थपिएको छ। यससँगै उनको कुल कैद सजाय साढे ८ वर्ष पुगेको हो।
अख्तियार दुरुपयोग अनुसन्धान आयोगले पौडेलसहितका प्रतिवादीले रु. ३ करोड ८ लाख ५० हजार ४ सय बराबरको भ्रष्टाचार गरेको अभियोगमा मुद्दा दायर गरेको थियो। अदालतले भ्रष्टाचार भएको ठहर गरे पनि अभियोगमा उल्लेख गरिएको सम्पूर्ण रकम घुसका रूपमा बरामद भएको वा बैंक खातामा जम्मा भएको पुष्टि हुने पर्याप्त प्रमाण नभेटिएको उल्लेख गरेको छ।
यद्यपि, मुद्दाको प्रकृति, प्रतिवादीहरूको भूमिका र उपलब्ध प्रमाणका आधारमा अदालतले बिगोबमोजिम दामासाही हिसाबले प्रतिव्यक्ति रु. १ करोड ५४ लाख २५ हजार २०० जरिबाना गर्ने निर्णय सुनाएको हो।
