काठमाडौं । राष्ट्रिय स्वतन्त्र पार्टी (रास्वपा) को प्रथम राष्ट्रिय महाधिवेशनको स्थल परिवर्तन गरिएको छ। अब महाधिवेशन चितवनस्थित चितवन उद्योग संघ अन्तर्राष्ट्रिय प्रदर्शनी केन्द्र मा आयोजना हुने भएको छ।
यसअघि महाधिवेशन चितवनको टाँडी स्थित होटल स्टारमा गर्ने तयारी गरिएको थियो। तर व्यवस्थापकीय तथा सहभागीको सहजतालाई ध्यानमा राख्दै स्थल परिवर्तन गरिएको जनाइएको छ।
रास्वपाका केन्द्रीय सदस्य राजन गौतम का अनुसार असार ७ देखि ९ गतेसम्म सञ्चालन हुने महाधिवेशनमा सहभागी हुने प्रतिनिधि तथा अतिथिहरूका लागि सौराहा, रत्ननगर र भरतपुरका विभिन्न होटलमा आवासको व्यवस्था मिलाइएको छ।
महाधिवेशनको तयारीलाई प्रभावकारी बनाउन पार्टीका स्थानीय, नगर तथा जिल्ला समितिहरू, जिल्लामा रहेका केन्द्रीय सदस्यहरू र प्रतिनिधिसभा सदस्यहरूको समन्वयमा १८ वटा उपसमिति गठन गरी काम अघि बढाइएको गौतमले जानकारी दिए।
रास्वपाको पहिलो राष्ट्रिय महाधिवेशनलाई सफल बनाउन आवश्यक व्यवस्थापन, आवास, यातायात, प्रचारप्रसारलगायतका तयारी तीव्र रूपमा अघि बढाइएको पार्टीले जनाएको छ।
