बेझाड । वित्तीय क्षेत्रमा राम्रो छवि बनाएको अन्धकारमुक्त बचत तथा ऋण सहकारी संस्थाले सदस्य सेवालाई पहिलो प्राथमिकता बनाएको छ । रामपुर नगरपालिकामा सञ्चालनमा रहेको यस सहकारीले ३६५ दिन कार्यालय सञ्चालन गरी सदस्यलाई सेवा दिँदै आएको व्यवस्थापक दीपेन्द्रप्रसाद पौडेल बताउनुहुन्छ ।
“सार्वजनिक बिदाका दिन तीन जना कर्मचारी र दुई जना कार्यालय सहयोगीबाट सेवा प्रवाह भइरहेको छ, सेवा नै ठूलो धर्म हो, हामी सदस्यको सेवामा निरन्तर खटिने छौँ,” उहाँले भन्नुभयो ।
अन्य वित्तीय संस्थाले सेवा दिन नसकेको, शनिबार र सार्वजनिक बिदाका समयमा अन्य कर्मचारीलाई सेवा लिन सजिलो परेको संस्थाका अध्यक्ष सागरप्रसाद देवकोटाले बताउनुभयो । शनिबार तथा सार्वजनिक बिदाका दिन विभिन्न सङ्घ संस्थामा कार्यरत कर्मचारी सेवा लिन आउने गरेको कर्मचारी सुमित्रा बाँस्तोला बताउनुहुन्छ । बिदाका दिन पनि सहकारीले सेवा दिँदा धेरै सहज भएको शेयर सदस्य उर्मिला राना बताउनुहुन्छ ।
विसं २०५६ पुस २० मा दर्ता भई सञ्चालनमा आएको यो सहकारी वित्तीय क्षेत्रमा नमूना सहकारीको रुपमा पहिचान बनाउन सफल भएको छ । सहकारीमा हाल बाल बचतसहित नौ हजार ७०९ सदस्य आवद्ध छन् ।
सहकारीमा हाल ८४ करोड बराबरको पुँजी रहेको छ । सहकारीले रामपुर नगरपालिकासहित पूर्वखोला गाउँपालिका, निस्दी गाउँपालिका र रम्भा गाउँपालिकालाई कार्यक्षेत्र बनाएर सेवा दिइरहेको छ ।
