फ्रेन्च लिग वान फुटबलमा पेरिस सेन्ट जर्मेन (पीएसजी) ले जित हात पारेको छ । शनिबार राति भएको खेलमा पीएसजीले मोन्टपिलरलाई ३–१ गोल अन्तरको हार चखाएको हो । मोन्टपिलरको मैदानमा १–० ले पछि परेको स्थितिलाई उल्टाउदै पीएसजीले जित निकालेको हो । खेलको ४१ औं मिनेटमा लीन्द्रो पारेडेसलेको आत्मघाती गोलबाट मोन्टपिलरले अग्रता बनाएको थियो ।
खेलको ७२ औं मिनेटमा पेड्रो मेन्डेसले रातो कार्ड पाएपछि मोन्टपिलर १० खेलाडीमा समेटिएको थियो । जसको फाइदा पीएसजीले उठायो । खेलको ७४ औं मिनेटमा नेयमारले गोल गर्दै पीएसजीलाई खेलमा फर्काए । ७६ औं मिनेटमा केलियण एमबाप्पेले गोल गर्दै पीएसजीलाई २–१ को अग्रता दिलाए ।
त्यसपछि खेलको ८१ औं मिनेटमा माउरो इकार्डीले गोल गर्दै पीएसजीलाई ३१ को जित दिलाए ।जितसँगै पीएसजीले १६ खेलमा ३९ अंक जोडेको छ । र, पीएसजी शीर्ष स्थानमा रहेको छ । २४ अंक जोडेको मोन्टपिलर आठौं स्थानमा रहेको छ ।
