काठमाडाैँ । प्रतिनिधि सभाको बिहीवारको बैठकमा राष्ट्रिय स्वतन्त्र पार्टी (रास्वपा)का सभापति रवि लामिछानेले सार्वजनिक तथा संवैधानिक निकायहरूमा स्वच्छ, पारदर्शी र प्रतिस्पर्धात्मक नियुक्ति प्रणाली लागू गर्न सरकार अग्रसर रहेको बताएका छन् ।
बैठकलाई सम्बोधन गर्दै उनले सरकारले नीति, कानून, मापदण्ड र स्थापित मान्यताका आधारमा नियुक्ति प्रक्रिया सुधार गर्ने दिशामा काम गरिरहेको दाबी गरे। उनले विगतमा राजनीतिक प्रभावका आधारमा नियुक्त भएका सार्वजनिक निकायका पदाधिकारीहरूलाई स्वेच्छाले पद छाडेर नयाँ प्रणालीका लागि मार्ग प्रशस्त गर्न आग्रह गरे ।
सभापति लामिछानेले सरकारले नयाँ ढंगले नियुक्ति प्रणालीलाई संस्थागत गर्न चाहेको उल्लेख गर्दै पारदर्शिता र प्रतिस्पर्धात्मकताको आधारमा मात्र योग्य व्यक्तिहरूलाई जिम्मेवारी दिनुपर्नेमा जोड दिए।
उनले न्याय पाउने पहिलो हक जेन–जी पुस्ताकी एक आमालाई भएको उल्लेख गर्दै त्यसलाई राजनीतिक प्रतिशोधको रूपमा नबुझ्न प्रतिपक्षी दलहरूलाई आग्रह गरे ।
यसैबिच उनले सार्वजनिक निकायहरूको सुधार, विश्वास पुनःस्थापना र प्रणालीगत रूपान्तरणका लागि सबै पक्ष जिम्मेवार बन्नुपर्ने आवश्यकता रहेको धारणा पनि व्यक्त गरे।
