काठमाडौं । प्रधानमन्त्री सुशीला कार्कीले प्रतिनिधिसभा निर्वाचन सफल बनाउन भूमिका खेलेको भन्दै नेपाल कम्युनिस्ट पार्टी (नेकपा) प्रति आभार व्यक्त गर्नुभएको छ।
प्रधानमन्त्रीको निमन्त्रणामा बालुवाटार पुगेका नेकपाका संयोजक तथा पूर्वप्रधानमन्त्री पुष्पकमल दाहाल प्रचण्ड, पूर्वप्रधानमन्त्री माधवकुमार नेपाल, नारायणकाजी श्रेष्ठ, वर्षमान पुनलगायत नेतासँग हालै सम्पन्न निर्वाचन र समसामयिक राजनीतिक विषयमा छलफल भएको थियो।
सो अवसरमा प्रधानमन्त्री कार्कीले निर्वाचनमा सहभागी भई अनुकूल वातावरण निर्माण गर्न सहयोग गरेको भन्दै नेकपा नेतृत्वप्रति धन्यवाद व्यक्त गर्नुभयो।
उहाँले भन्नुभयो, “तपाईँहरुले निर्वाचनमा भाग लिनुभयो, वातावरण बनाउनुभयो र मुलुकलाई शान्तिपूर्ण तथा लोकतान्त्रिक प्रक्रियाबाट निकास दिन सहयोग गर्नुभयो, यसका लागि धन्यवाद।”
प्रधानमन्त्री कार्कीले निर्वाचनमा विजयी भएका नेताहरुलाई बधाई दिँदै अन्य उम्मेदवारलाई आगामी अवसरका लागि शुभकामना व्यक्त गर्नुभयो।
छलफलका क्रममा नेकपा नेताहरुले पनि प्रधानमन्त्री कार्कीको नेतृत्वमा निर्वाचन सम्पन्न भई मुलुकले निकास पाएको उल्लेख गर्दै बधाई दिएका थिए।
संयोजक प्रचण्डले निर्वाचन नभएको भए मुलुक गम्भीर संकटतर्फ जान सक्ने उल्लेख गर्दै प्रधानमन्त्रीको नेतृत्वको प्रशंसा गर्नुभयो। “निर्वाचन गराउने काम निकै साहसिक र प्रशंसनीय छ,” उहाँले भन्नुभयो।
त्यस्तै, पूर्वप्रधानमन्त्री नेपालले प्रधानमन्त्री कार्कीको नेतृत्वप्रति विश्वास व्यक्त गर्दै देशको राजनीतिक स्थायित्व र संवैधानिक व्यवस्था जोगाउन उहाँको भूमिका महत्त्वपूर्ण रहेको बताउनुभयो।
नेताहरुले अव्यवस्थित अवस्थाबिच छोटो समयमै निर्वाचन सम्पन्न गर्नु चुनौतीपूर्ण भए पनि प्रधानमन्त्री कार्कीको दृढता, इमानदारी र नेतृत्व क्षमताका कारण सम्भव भएको धारणा व्यक्त गरेका थिए।
