युरोपेली फुटबलको प्रतिष्ठित प्रतियोगिता च्याम्पियन्स लिग फुटबल प्रतियोगिताको पहिलो लेगमा स्पेनी महारथी रियल म्याड्रिडसँग म्यान्चेस्टर सिटी पराजित भएकोछ ।
रियल म्याड्रिडको गृह मैदान बर्नबाउ स्टेडियममा बुधबार राति भएको खेलमा रियलले ३—० गोल अन्तरले सिटीलाई धुलो चटायो । रियलका लागि फेडेरिको भन्भर्डले ह्याट्रिक गरे । उनले पहिलो हाफको २०, २७ र ४२ मिनेटमा गोल गरेका थिए ।
यो जितपछि सिटीको क्वार्टरफाइनल यात्रा निकै कठिन बन्ने अवस्था सिर्जना भएको छ ।
अर्को खेलमा, फ्रेन्च क्लब पिएसजीले चेल्सीमाथि फराकिलो जित निकालेर क्वार्टरफाइनल नजिक पुगेको छ । पिएसजीले आफ्नो गृह मैदान पार्क डेस प्रिन्सेसमा चेल्सीलाई ५—२ गोल अन्तरले पराजित गरेको छ ।
ब्राड्ली बार्कोलाले पिएसजीका लागि १०औं मिनेटमै पहिलो गोल गरेका थिए । त्यसपछि डेम्बेलेले ४०, भिटिन्हाले ७०, केभिचाले ८६ र ९४औं मिनेटमा गोल गरेका थिए ।
चेल्सीका लागि सान्त्वना गोल मालो गस्टोले २८ तथा एन्जो फर्नान्डेजले ५७ औं मिनेटमा गोल गरेका थिए । यो हारपछि चेल्सीलाई क्वार्टरफाइनल पुग्न निकै संघर्ष गर्नुपर्ने अवस्था भएको छ ।
यसैगरी, यस सिजन च्याम्पियन्स लिगमा उत्कृष्ट प्रदर्शन गरिरहेको आर्सनल भने जर्मन क्लब बायर लिभरकुसेनसँग स्तब्ध भएको छ । लिभरकुसनको गृह मैदान बे—एरिना रंगशालामा भएको खेलमा दुबै टिम १—१ को बराबरीमा रहे ।
उत्कृष्ट खेल प्रदर्शन गरेर आर्सनलमाथि निरन्तर दबाब सिर्जना गरेको लिभरकुसनका लागि ४६औं मिनेटमा रोबर्ट एन्ड्रिकले गोलको खाता खोलेका थिए ।
आर्सनललाई बराबरीमा खेल टुङ्ग्याउन हम्मेहम्मे परिरहेको अवस्थामा ८९औं मिनेटमा आर्सनलले पेनाल्टीको अवसर पाएको थियो । आर्सनलका लागि स्थानापन्न खेलाडी काई हाभार्जले गोल गर्दै टिमलाई बराबरीमा ल्याए ।
खेलका नतिजा संक्षेपमा
आर्सनल vs बायर लिभरकुसेन (१—१)
पिएसजी vs चेल्सी (५—२)
रियल म्याड्रिड vs म्यान्चेस्टर सिटी (३—०)
बोडो vs स्पोर्टिङ (३—०)
