काठमाडौं । इजरायलमा विकसित हुँदै गएको सुरक्षा अवस्थालाई ध्यानमा राख्दै इजरायलमा रहेको नेपाली दूतावासले त्यहाँ बसोबास गरिरहेका नेपाली नागरिकलाई विशेष सतर्कता अपनाउन आग्रह गरेको छ।
दूतावासले जारी गरेको परामर्शअनुसार हाल मध्यपूर्व क्षेत्रमा देखिएको तनावपूर्ण परिस्थितिका कारण सुरक्षा सावधानी कडाइका साथ पालना गर्न अनुरोध गरिएको हो।
दूतावासले इजरायलमा रहेका नेपालीलाई स्थानीय सुरक्षा निकाय र होम फ्रन्ट कमाण्डले जारी गर्ने निर्देशनहरू अनिवार्य रूपमा पालना गर्न, सकेसम्म घरभित्रै बस्न तथा अनावश्यक आवतजावत नगर्न सुझाव दिएको छ। साथै, सम्बन्धित निकायको अनुमति बिना यात्रा नगर्न पनि आग्रह गरिएको छ।
परामर्शमा स्थानीय समाचार, आधिकारिक सूचना तथा आपतकालीन चेतावनी नियमित रूपमा निगरानी गर्न र आफ्नो क्षेत्रमा रहेका नेपाली समुदायसँग निरन्तर सम्पर्कमा रहन भनिएको छ। नजिकका सुरक्षित आश्रयस्थल (सेल्टर) को जानकारी राखी आवश्यक परे तत्काल त्यहाँ पुग्न तयारी अवस्थामा रहन पनि दूतावासले आग्रह गरेको छ।
दूतावासले तेल अविव स्थित आफ्नो कार्यालयसँग नियमित सम्पर्क कायम राख्न अनुरोध गर्दै आवश्यक परे अद्यावधिक सूचना निरन्तर जारी गरिने जनाएको छ। आपतकालीन अवस्थाका लागि दूतावासले फोन र इमेलमार्फत सम्पर्क गर्न सकिने जानकारी समेत दिएको छ।
हालको परिस्थितिलाई मध्यनजर गर्दै नेपाली नागरिकलाई संयमित, सचेत र सुरक्षित रहन दूतावासले पुन: अपिल गरेको छ। यसैबिच नेपाल सरकारले तत्काल इजरायल र इरानको यात्रा नगर्न सुचित गरेको छ ।
परराष्ट्र मन्त्रालयले आज ट्राभल एडभाइजरी जारी गर्दै इजरायल वा इरान यात्रा गर्ने योजना बनाइरहेका नेपाली नागरिकहरूलाई हालको अवस्था सामान्य नभएसम्म यात्रा स्थगित अपील गरेको हो ।परराष्ट्र मन्त्रालयले मध्यपूर्वमा विकसित भइरहेको परिस्थितिलाई नजिकबाट अनुगमन गरिरहेको बताएको छ ।
फोटो- रासस /एपी
